एजेन्सी – एट्लेटिको म्याड्रिडले शनिबार ला लिगामा जितेपछि फरवार्ड लुइस सुआरेज भावुक भए । एटलेटिकोका लागि पछिल्लो दुवै खेलमा विजयी गोल गरेका उनले आफ्नो आँसु रोक्न सकेनन् ।

रियल भालाडोलिडलाई २–१ ले हराउँदै एट्लेटिकोले उपाधि पक्का गर्दा सुआरेजले निर्णायक गोल गरेका थिए । यो सिजन त्यो उनको सिजनको २१ औं गोल थियो ।

बार्सिलोनाका प्रशिक्षक रोनाल्ड कोम्यानले सुआरेज आफ्नो प्राथमिकतामा नरहेको बताएपछि सिजनको सुरुवातमा उनी एट्लेटिको पुगेका थिए । ‘यो साच्चै कठीन थियो,’ आँसु लुकाउने कोशिस गर्दै उनले भने, ‘मेरो लागि अवस्था सहज थिएन । मेरो मनोबल कमजोर भएको थियो । त्यस्तो बेलामा एट्लेटिकोले मेरो लागि ढोका खोलेको थियो ।’

बार्सिलोनाका अन्तिम दिनहरु आफ्ना लागि निकै पीडादायिक रहेको पनि उनले स्मरण गरे । उनले भने,’मेरो श्रीमती, बच्चाहरु सबै दुःखी थिए । वर्षौ देखि मैले बिताएको क्षेत्र फुटबलमा पनि मलाई कठिन भएको थियो ।’

केहि गुनासो हुँदा हुँदै सुआरेजले आफू र एट्लेटिको परिवारलाई सिजनको सफलतामा गर्व लागेको बताएका छन् । ‘हाम्रा लागि यो वर्ष उत्कृष्ट रह्यो । कठिनाई रहे । त्यसका वावजुद हामीले एकरुपताको प्रदर्शन गर्यौं र च्याम्पियन बन्यौं, ‘उनले भने, ‘सिजनको सुरुवात निकै प्रभावकारी रह्यो । त्यो सामान्य थिएन ।’

अन्त्यमा उनले आफूले ला लिगा जित्दा बार्सिलोनाका सुपर स्टार लिओनल मेस्सी खुसी भएको हुन सक्ने अनुमान गरे । उनले भने, ‘उनी खुसी होलान्, किनकी हामी साथी हौं ।’ मेस्सीको बार्सिलोना यसपटक तेस्रो हुँदा रियल म्याड्रिडले दोस्रो हुँदै सिजनको अन्त्य गरेको थियो ।