एजेन्सी – युभेन्ट्सले मासिमिलियानो एलेग्रीलाई पुनः प्रशिक्षक नियुक्त गरेको छ । आन्द्रे पिर्लोलाई बर्खास्त गरेको केहि घन्टा पछि नै युभेन्ट्सले एलेग्रीलाई प्रशिक्षक नियुक्त गरेको हो ।

सिजनको सुरुवातामा माउरिजियो सारीलाई बर्खास्त गर्दै युभेन्ट्से इटालीका पूर्व अन्तर्राष्ट्रिय ४२ वर्षे पिर्लोलाई आश्चार्यजनक रुपमा जिम्मेवारी दिएको थियो । उनको नेतृत्वमा युभेन्ट्स सिरिएमा चौथो बन्यो । सन् २०१२ यता टोली पहिलो पटक सिरि ए जित्न असफल भएको थियो ।

एलेग्रीले युभेन्ट्सलाई २०१४ देखि २०१९ सम्म प्रशिक्षण दिएका थिए । उनको नेतृत्वमा युभेन्ट्सले ५ पटक सिरिए, ४ वटा कोपा इटालियन जितेको थियो भने २ पटक च्याम्पियन्स लिगको फाइनलमा पुगेको थियो ।

‘अब हामी फेरि एलेग्री ल्याउन तयार भएका छौं । भविष्यमा टोलीलाई थप व्यसायिक र बलियो बनाउनका लागि उनलाई भित्र्याएका हौं’, क्लबले विज्ञप्तीमार्फत भनेको छ । २०१९ को जुनमा युभेन्ट्स छाडेयता ५३ वर्षे एलेग्री फुटबलबाट अलग छन् ।

पिर्लोले टोलीलाई सुपर कप र कोपा इटालिया दिलाएपनि क्लबका लागि त्यो पर्याप्त मानिएको छैन । पिर्लोले खेल जीवनमा युभेन्ट्सका लागि १ सय ६४ खेल खेलेका थिए । एसी मिलानबाट युभेन्ट्स पुगेपछि २०११ देखि २०१५ सम्म उनले टोलीलाई ४ पटक सिरिए उपाधि जितेका थिए ।

खेल जीवनको लामो समय मिलानमा बिताएका उनले २ च्याम्पियन्स लिग र २ पटक सिरिए जितेका थिए । इटालीका लागि १ सय १६ क्याप जितेका उन सम्मलित टोलीले २००६ मा विश्व कप जितेको थियो । युभेन्ट्सले उनलाई धन्यवाद दिएको छ ।