एजेन्सी – तीनपल्टको युरोपेली च्याम्पियन स्पेनले आज राति घरेलु मैदानमा स्वीडेनको सामना गर्दैछ । खेल सेभियामा नेपाली समयअनुसार राति १२:४५ बजेपछि हुनेछ ।

सन् २००८ देखि २०१२ बीचमा तीन उपाधि जितेको स्पेनको टोली अहिले सोही अवस्थामा नरहँदा सोही अवस्थामा फर्कने लक्ष्यमा रहेको छ । त्यो पुस्ता (२००८–२०१२) का खेलाडी हराइसके । पछिल्ला केही वर्ष स्पेनका लागि खासै सुखद रहेन । अब नयाँ अनुहारले टिममा प्रवेश पाइसकेको छ । स्विडेनको सामना गर्दा स्पेन एउटा नयाँ युग सुरु गर्न चाहन्छ ।

स्पेनले पछिल्ला तीन ठूला प्रतियोगितामा क्वाटरफाइनल भन्दा अघि बढ्न सकेको छैन । त्यसैले यसपटक स्पेनलाई सोही दवाव पनि रहेको छ । प्रशिक्षक लुइस एनरिकले टोलीका अनुभवी कप्तान सर्जियो रामोसलाई फिटनेसको कारण देखाउँदै टोलीमा समेटेनन् । लामो समयपछि स्पेन रामोसबिना ठूलो प्रतियोगितामा होमिएको छ ।

तर त्यसको ठीक विपरीत टिममा नयाँ युवा खेलाडीले बाहुल्याता जमाएका छन् । जर्मनीजस्तो बलियो टोलीविरुद्ध नेसन्स लिगमा ह्याट्रिक पुरा गरेका फेरान टोरेस यही नयाँ पुस्तामा उदाएका छन् । कप्तान सर्जियो बुस्क्वेट्स कोरोना संक्रमणका कारण टोली नरहँदा स्पेनलाई थप दवाव हुनेछ ।

टोलीसँग अल्भारो मोराटा, जेरार्ड मोरेनो, पेड्री, रोड्री, मार्काेस लोरेन्टे, जोडी अल्वा, पाउ टोरेस, एमेरिक लापोर्टा, सिसर एज्पिलिक्वेटा र गोलरक्षक युनाई सिमोन रहनेछन् । यस्तै एरिक गार्सिया, थियागो अलकान्तरा, कोकी, ड्यानियल ओल्मो, पाब्लो साराविया, एडमा ट्राओरे र मिकेल ओयरजावाल पनि टोलीमा रहेका छन् ।

नेसन्स लिगमा युक्रेनसँग १–० ले स्तब्ध भएको स्पेन त्यसयता (युरोअघिको अन्तिम अभ्यास खेल स्पेन यु–२१ र लिथुआनिया) सहित ८ खेलमा अपराजित छ । यही बीचमा स्पेनले जर्मनीमाथि ६–० को सानदार जित हात पारेको थियो ।

यता, स्वीडेन पनि आफ्नो भेट्रान तथा अनुभवी फरवार्ड ज्लाटन इब्राहिमोभिचविना युरोमा उत्रिनेछ । चोटका कारण ज्लाटन इब्राहिमोभिच टिममा छैनन् । स्वीडेन आफै पनि नयाँ पुस्ताका खेलाडीमा निर्भर हुनेक्रममा छ । एलेक्जान्डर इसाक र जोर्डन जस्ता दुई युवा खेलाडीले स्पेनमाथि दबाब सिर्जना गर्न सक्नेछन् । मार्कस वर्ग, एमिल फोर्सवर्ग, क्रिस्टोफोर ओल्सेन, अल्विन एक्दल, भिक्टोर लिन्डेलफ, रोविन ओल्सेन र सेवास्टिन लार्सन टोलीमा रहँदा डिजान कुलसेभ्स्कीले कोभिडका कारण खेल गुमाउनेछन् ।

नोभेम्वरमा नेसन्स लिगमा फ्रान्ससँग ४–२ ले पराजित भएयता पोल्यान्डले सबै पाँच खेलमा जित निकालेको छ । स्वीडेन सोही जितको लयलाई कायम राख्ने दाउमा हुनेछ । पछिल्लो दुई खेलमा स्पेन एक खेलमा विजयी हुदा एक खेल बराबरीमा सकिएको छ ।