एजेन्सी – युरोपेली च्याम्पियनसिपको सबैभन्दा महत्वपुर्ण र रोमाञ्चक खेलमा आज राति विश्वविजेता फ्रान्स र जर्मनी आमने सामाने हुँदैछ । एलिएन्ज एरिना म्युनिख जर्मनीमा यि दुई टोलीबीच नेपाली समयअनुसार राति १२ः४५ बजे हुने खेललाई निकै महत्वका साथ हेरिएको छ ।

ग्रुप अफ डेथ मानिएको यो समूह ‘एफ’ मा पोर्चुगल र हंगेरी पनि रहेका छन् । हंगेरीलाई यो समूहमा अन्डरडगको रुपमा हेरिएको छ । विश्वकप विजेता फ्रान्सलाई यसपल्टको युरोमा सबैभन्दा बलियो दाबेदार टोलीमा रुपमा हेरिएको छ । २०१६ मा पनि दावेदार टोलीमा रुपमा रहेपनि घरेलु मैदानमा फाइनलमा पोर्चुगलसँग चुकेको थियो ।

त्यसयता लगातार गज्जवको प्रदर्शन गरिरहेको फ्रान्सले विश्वकपको ट्रफी उचाल्दा आफ्नो लयलाई अझैपनि कायम राखेको छ । नम्वर ‘नाइन’ पोजिसनका करिम बेन्जेमाले ६ वर्षपछि राष्ट्रिय टोलीमा पूनरागमन गर्दा यही समयमा केलियन एमबाप्पे स्टार खेलाडीको रुपमा उदाउँदा छन् । ओलिभर जिरुड फ्रान्सको सर्वाधिक गोलकर्ता बन्ने लक्ष्यमा छन् । चोटका कारण करिम बेन्जेमाले जर्मनीविरुद्ध खेल्ने सम्भावना न्युन छ ।

यता, जर्मनी भने प्रशिक्षक जोचिम लोको नेतृत्वमा अन्तिम प्रतियोगिता खेलिरहेको छ । पछिल्लोपल्ट लोको नेतृत्वमा जर्मनीको प्रदर्शन उत्साहजनक हुन सकेको छैन । उनकै प्रशिक्षणमा ब्राजिललाई ७–१ को नमिठो हार चखाएको जर्मनीले यसैवर्ष स्पेनसँग ६–० को नमिठो हार चाखिसकेको छ । जोचिम लो जर्मनीका लागि आफ्नो अन्तिम प्रतियोगितालाई सुखद अन्त्य गर्न चहान्छ । तर, जर्मनीले समूह चरणमा फ्रान्ससँगै पोर्चुगल र हंगेरीको चुनौती पन्छाउनुपर्ने हुन्छ ।

टोलीसँग थोमस मुलर म्याट हमेल्स जोडिदा काई हाभर्टज, टिमो वेर्नर, सर्ज जिनाब्री, केभिन भोलान्ड, जमल मुसियाला, रोविन गोसेन्स, योसुवा किम्मिख, इल्केए गुन्डोगान, टोनी क्रुस, निकलस सुल र म्यानुयल नुएर जास्ता विश्वस्तरीय खेलाडी रहेका छन् ।

‘फ्रान्स पछिल्लो समय विश्व फुटबलको सबैभन्दा सन्तुलित टिम हो । फ्रान्सले कसरी फुटबल खेल्छ भनेर अनुमान गर्न सक्छौं, तर कहिलेकाहीं यो कसैको क्षमताभन्दा बाहिरको हुन्छ । हाम्रो टिमको अहिलेको माहोला राम्रो छ । आत्मविश्वासी भएर खेल्नेछौं । नतिजा आफ्नो पक्षमा पार्न सकिन्छ,’ प्रशिक्षक लोले भनेका छन् ।

फ्रान्सेली प्रशिक्षक डिडिएर डेसच्याम्पले जर्मनीसँग धेरैपल्ट खेलिसकेको बताउँदै नजिता जे पनि हुन सक्ने बताएका छन् ।

यि दुई टोलीको पछिल्लो ८ खेलको नतिजामा फ्रान्स चार खेलमा विजयी हुदा जर्मनीले दुई खेल जितेको छ । दुई खेल बराबरीमा सकिएको छ ।
पछिल्लो पाँच खेलमा फ्रान्स जर्मनीसँग अपराजित छ ।

सन् २०१४ को विश्वकपको क्वाटरफाइनलमा फ्रान्स जर्मनीसँग १–० ले पराजित भएको थियो । त्यसयता फ्रान्सले ३ खेल जित्दा २ खेल बराबरीमा सकिएको छ । पछिल्लोपटम २०१८ को नेसन्स लिगमा फ्रान्सले २–१ को जित निकालेको थियो ।