एजेन्सी – पोर्चुगलका कप्तान क्रिस्टियानो रोनाल्डोले युरोपेली च्याम्पियनसिप २०२० अन्तर्गत पहिलो खेलमा हंगेरीविरुद्ध उत्कृष्ट प्रदर्शन गर्दै स्टार अफ द म्याचको अवार्ड जितेका छन् ।

पोर्चुगलले ३-० को जित आत्मसात गर्दा रोनाल्डोले २ गोल गरेका थिए । अन्तिम समयमा लगातार गोल गर्दै पोर्चुगलले जित दर्ता गर्दा रोनाल्डोले पछिल्लो दुई गोल गरेका थिए ।

यूईएफएका प्राविधिक अवालोककर्ता कोरिन दिआक्रेले खेलमा उत्कृष्ट प्रदर्शन गरेका रोनाल्डोलाई स्टार अफ द म्याच चुनेका थिए । रोनाल्डोले खेल अवधिभर निर्माण गरेको अवसर र गोलका कारण स्टार अफ द म्याच चुनेको उनको भनाइ थियो ।

राफेल गुरेरो गोलमा अग्रता लिएको पोर्चुगलले पेनाल्टीको पाएपछि रोनाल्डोले ८७ औं मिनेटमा अग्रता दोब्बर पार्न अघि बढेका थिए । विलि ओर्बानले राफा सिल्भालाई पेनाल्टी क्षेत्रभित्र लडाएपछि रेफ्रीले पेनाल्टी दिएका थिए । रोनाल्डोले उक्त पेनाल्टीलाई गोलमा परिणत गर्दै २-० को अग्रता दिलाए । रोनाल्डोले गोलरक्षकलाई विपरित दिशामा डाइभ गराउँदै प्रतियोगितामा व्यक्तिगत पहिलो गोल गरे ।

इन्ज्युरी समयको दोस्रो मिनेटमा रोनाल्डोले अर्को गोल गर्दै ३-० को अग्रता दिलाए । राफा सिल्भाकै पासमा पेनाल्टी क्षेत्रभित्र संयमित रोनाल्डोले अफसाइड ट्रयाप बिट गर्दै फिनिस गरेका थिए । यससँगै रोनाल्डोले युरोमा आफ्नो गोल संख्या ११ पुर्याए । त्यस्तै अन्तर्राष्ट्रिय गोल संख्या १ सय ६ पुर्याएका उनी अब अलि दाइको कीर्तिमान बराबरी गर्नबाट ३ गोलले पछि छन् ।

रोनाल्डोले खेलमा अर्को कीर्तिमान भने राखे । यस खेलमार्फत उनी पाँच पटक युरोपेली च्याम्पियनसिपमा सहभागी हुने पहिलो खेलाडी बने । रोनाल्डोले सन् २००४ को युरोमा पोर्चुगल उपविजेता हुँदादेखि सन् २००८, २०१२ र सन् २०१६ मा उपाधि जित्दै यसअघिको कीर्तिमान बराबरी गरेका थिए ।

रोनाल्डोले युरोमा गोलसंख्या ११ गोल पुर्याए । यसअघि फ्रान्सका मिचेल प्लाटिनीसँग ९ गोलमा बराबर रहेका रोनाल्डोले २२ खेलमा यो उपलब्धि हासिल गरेका हुन् । उनलाई फ्रान्सका एन्टोइन ग्रिजमनले ६ गोल गर्दै पछ्याइरहेका छन् ।

यो पनि : पोर्चुगलको विजयी सुरुवात