काठमाडौं (हाम्रो खेलकुद) – नेपाल सुपर लिग (एनएसएल) टोली विराटनगर सिटी एफसी र भुटानको पारो फुटबल क्लबबीच प्राविधिकलगायत अन्य विषयमा सहकार्य गर्ने गरि सम्झौता भएको छ । विराटनगरका प्रमुख कार्यकारी अधिकृत सुभाषिश कोइराला र पारोका अध्यक्ष कर्मा जिग्मेले शुक्रबार सम्झौता पत्रमा हस्ताक्षर गरेका थिए ।

सम्झौता अनुसार दुई क्लबबीच फुटबल विकासका लागि प्राविधिकलगायत अन्य सहकार्य हुनेछ । त्यस्तै दुईतर्फका सिनियर र खेलाडी आवश्यकता अनुसार आपसी सहमतिमा एकअर्कालाई उपलब्ध गराउने सम्झौतामा उल्लेख छ । त्यस्तै प्रि सिजन र मैत्रीपूर्ण खेलका लागि दुवै टोली आउन जान सक्ने, नेपाल र भुटानमा हुने फुटबल प्रतियोगिताका लागि आवश्यक समन्वय गर्न सकिने पनि सम्झौतामा रहेको छ । सम्झौता एक वर्षको रहनेछ ।

दुई देशबीचको क्लबको सम्झौताले फुटबल विकासमा सहयोग पुग्ने विश्वास रहेको विराटनगरका सिइओ कोइरालाले बताए ।यो सहकार्यको सुरुवात हो । दुई देशबीचको क्लबको सहकार्यले त्यहाँको फुटबल विकासमा मद्दत पुग्ने विश्वास लिएका छौं,’ कोइरालाले भने, ‘पहिलो वर्षको सहकार्यपछि समीक्षा गरेर लामो सहयात्रा हुन सक्ने सम्भावना छ ।’

जेठ १ गते दशरथ रंगशालामा सम्पन्न देशकै पहिलो फ्रेन्चाइज लिग एनएसएलको सहभागी ७ मध्ये विराटनगर एक हो । सुरुवात राम्रो गरेपनि विराटनगर प्ले अफ पुग्न असफल भएको थियो । पारो भुटान सुपर लिग र भुटान प्रिमियर लिग खेल्दै आएको छ । ३ वर्ष अघि स्थापना भएको क्लब सन् २०१९ को प्रिमियर लिग च्याम्पियन बनेको थियो । टोलीले गत वर्ष एएफसी कप छनोटको दोस्रो चरण सम्मको यात्रा गरेको थियो ।