काठमाडौं (हाम्रो खेलकुद)– सहिद स्मारक ए डिभिजन क्लब न्यूरोड टिम (एनआरटी) लाई प्रशिक्षकमा राजुकाजी शाक्य निरन्तरता दिएको छ । दुई अफ्रिकी खेलाडी मेसुके ओलुमो र स्टेफन समिरलाई अनुबन्धन गर्ने शनिबारको पत्रकार सम्मेलनमा एनआरटीले शाक्यलाई प्रशिक्षकका रुपमा प्रस्तुत गरेको थियो ।

राष्ट्रिय फुटबल टोलीका पूर्व कप्तान तथा प्रशिक्षक शाक्यले लामो समय एनआरटीलाई प्रशिक्षण दिएका छन् । बीचमा अन्य क्लबलाई प्रशिक्षण दिएका शाक्य २०७६ मा पुनः एनआरटी नै फर्केका थिए । शाक्य एनआरटीलाई परिवार जत्तिकै ठान्छन् । ‘म परिवारमा बसेको महसुस गर्छु,’ उनले भने, ‘सायद मैलै प्रशिक्षकको करियर यहिबाट अन्त्य गर्छु होला ।’

शाक्य नतिजा भन्दा बढी प्रदर्शनलाई महत्व दिने प्रशिक्षकमा गनिन्छन् । ‘हरेक प्रशिक्षकले नतिजाको लागि प्रयास गर्नु स्वभाविक हो । तर म टोलीको प्रदर्शन पनि राम्रो हुनुपर्दछ भन्ने ठान्दछु,’ उनले थपे, ‘तर त्यसको लागि समय लाग्छ । लामो समय खेलाडीहरुलाई एउटा क्लबमा राख्न कठिन हुन्छ , त्यसैले एकरुपको प्रदर्शन गराउन कठिन हुन्छ ।’

प्रशिक्षकका लागि उत्कृष्ट प्रदर्शन गराउन र नतिजा दिलाउन सधै चुनौती हुने उनले बुझेका छन् । ‘मैले पहिलो पटक २०५६ सालमा एनआरटी हेर्दा लिग जित्ने नजिक पुगेका थियौं । अन्तिम खेलमा हारेर दोस्रो भयौं,’ उनले स्मरण गरे, ‘हामीले जहिले पनि ठूलो नाम भन्दा पनि सन्तुलित टोली बनाएका छौं । स्टारहरु भित्राएर होइन आफ्नो टोलीमाथि विश्वास गरेर नजिता ल्याउने कोसिस गछौं । मैले टोली हेर्दा लिगमा हरेक पटक शीर्ष ४ मा राख्न सफल भएको छु ।’

प्रशिक्षणका हिसाबले शाक्य नेपाली प्रशिक्षकमा उत्कृष्ट मध्येका मानिन्छन् । यद्दपी उनले कुनै क्लबलाई लिग जिताउन सकेका छैनन् । खेल जीवनमा देशका लागि स्वर्ण पदक दिलाउन नेपाली टोलीको कप्तानी गरेको शाक्यले नेपाललाई अर्को स्वर्ण पदक दिलाउने समयमा प्रशिक्षकको भूमिका निर्वाह गरेका थिए ।

सन् १९९३ मा नेपालले तत्कालिन दक्षिण एसियाली महासंघिय खेलकुद (साफ) हालको दक्षिण एसियाली खेलकुद (साग) मा स्वर्ण पदक जित्दा शाक्य टोलीको कप्तान थिए । त्यहि सागको १२ औं संस्करणमा नेपाली टोलीलाई उनले स्वर्ण पदक दिलाएका थिए । यद्दपी, उनी कप्तान हुँदा नेपालको सिनियर टोलीले खेल्थ्यो भने सागको नवौं संस्करणपछि यू २३ टोलीबीच प्रतिस्पर्धा भएको थियो ।

शाक्यले एनआरटीपछि विभागीय त्रिभुवन आर्मी फुटबल क्लब, मछिन्द्र क्लब, संकटा क्लब, मनाङ–मस्र्याङ्दी क्लब र च्यासल युथ क्लब पुनः एनआरटी फर्केका थिए । जेठमा सम्पन्न नेपाल सुपर लिगमा भने उनी बुलवल लुम्बिनी एफसीको महाप्रबन्धकको रुपमा आबद्ध थिए ।