एजेन्सी – स्पेनिस क्लब रियल म्याड्रिडले पूर्व कप्तान सर्जियो रामोसले प्रयोग गरेको जर्सी नम्बर ४ नयाँ डिफेन्डर डेविड अलाबालाई प्रदान गरेको छ । अलाबा यसै सिजन बायर्न म्युनिखबाट फ्री ट्रान्सफरमा आएका हुन् ।

स्टार सेन्टरब्याक रामोसले क्लबसँग नयाँ सम्झौतामा सहमति नहुँदा क्लब छाडेका थिए । दुईपक्षबीच सम्झौता विस्तारको लागि धेरै छलफल भएपनि सहमतिमा पुग्न नसक्दा उनी फ्रि एजेन्टको रुपमा फ्रान्सेली क्लब पीएसजीमा २ वर्षको लागि अनुबन्धित भए । उनले पीएसजीमा आफ्नो ४ नम्बर जर्सी नै रोजेका छन् ।

रियलमा १६ वर्ष बिताएका उनी क्लबको एक लेजेण्ड खेलाडीको रुपमा स्थापित छन् । टोलीमा उनको धेरै सम्मान थियो । अहिले उनी क्लबमा रहेपनि टिम भित्र उनको लागि धेरै सम्मान रहेको देखिन्छ । उनले सन् २००५ देखि २०२१ सम्म क्लबमा ४ नम्बरको जर्सीमा खेले ।

अलाबाले रियलसँग ४ वर्षका लागि सम्झौता गरेका हुन् । लेफ्ट ब्याकबाट करिअर सुरु गरेका उनी पछिल्लो समय सेन्टर डिफेन्सका रुपमा खेलिरहेका छन् । उनलाई युरोपमा पछिल्लो समय उत्कृष्ट डिफेन्डरको रुपमा हेरिएको छ ।

अलाबालाई बायर्नले क्लबमै राख्न तीन पटक प्रस्ताव गरेपनि उनले क्लब छाड्ने निर्णयमा लिएका थिए । सन् २००८ मा बायर्नमा आएका भर्सटाइल डिफेन्डर अलाबाले त्यसपछि लोनमा ६ महिना अर्काे जर्मन क्लब होफेनहाइनमा पुगेका थिए । त्यसपछि उनी निरन्तर बायर्नमै रहेका थिए ।

अलाबाले बायर्नका लागि हालसम्म ४ सय बढी खेल खेल्दै खेलमा ३२ गोल र ४९ असिस्ट दिँदै २७ उपाधि जितेका छन् । जसमा दुई च्याम्पियन्स लिग, १० जर्मन बुन्डेसलिगा, ६ डिएफवी पोकल, ५ जर्मन सुपर कप, २ युइएफए सुपर कप र दुई क्लब विश्वकप रहेको छ ।