एजेन्सी – टोकियो ओलम्पिक अन्तरगतको महिला फुटबलमा ब्राजिललाई पछि पार्दै नेदरल्यान्ड्स समूह ‘एफ’ बाट समूह विजेता बन्दै क्वाटरफाइनलमा प्रवेश गरेको छ ।

ब्राजिलसँग समान ७ अंक रहेपनि नेदरल्यान्ड्स गोल अन्तरमा अघि रहँदै समूह विजेता बनेको हो । नेदरल्यान्ड्सले समूह चरणको तीन खेलमा २१ गोल गर्दा ८ गोल खायो । यता, ब्राजिलले ९ गोल गर्दै ३ गोल मात्रै बेहोरेको थियो । समूहमा नेदरल्यान्ड्स र ब्राजिल अपराजित रहे ।

समूह चरणको अन्तिम खेलमा मंगलबार नेदरल्यान्ड्सले चीनमाथि ८–२ को फराकिलो जित दर्ता गर्दै समुह विजेता बनेको हो । डच टोलीको फराकिलो जितमा लिनेथ विरेन्सटेन, लिकी मार्टिन्स र भिभिएनी मिडेमाले समान २–२ गोल गर्दा सानिस भान डि सान्डेन र भिक्टोरिया पेलोभाले समान एक गोल गरिन् । चीनका लागि सान्सान वाङ र यान्वेन वाङले गोल गरिन् ।

गोलको वर्ष भएको खेलमा नेदरल्यान्ड्सले पहिलो हाफमा ३–१ अग्रता लिदा दोस्रो हाफमा ५ गोल थप्दा एक गोल बेहोरेको थियो । चीनविरुद्ध दुई गोल गरेकी मिडेमा ८ गोलसहित सर्वाधिक गोलकर्ताको सुचीमा शीर्षमा छिन् ।

यही समूहको अर्काे खेलमा ब्राजिलले १० खेलाडीमा समेटिएको जाम्वियामाथि १–० को संघर्षपुर्ण जित निकाल्दै समूह उपविजेता बन्दै क्वाटरफाइनलमा पुग्न सफल भयो । १३औं मिनेटमा लुसहोमो सिधै रातो कार्ड खाँदै मैदानबाट बाहिरिदा जाम्विया समस्यामा परेको थियो । १९औं मिनेटमा एन्ड्रिसा एलभेसले गोल गर्दै ब्राजिललाई १–० को अग्रता दिलाइन् । त्यही गोल नै ब्राजिलको जितमा निर्णायक बन्यो । जाम्विया र चीन समूह चरणबाटै बाहिरिएको छ ।

यस्तै समूह ‘ई’ मा क्यानडा र इंग्ल्यान्डले १–१ गोलको बराबरी खेल्दा जापानले चिलीमाथि १–० को जित दर्ता गरेको छ । यो नजितापछि इंग्ल्यान्ड समूह विजेता तथा क्यानडा समूह उपविजेताको रुपमा क्वाटरफाइनलमा प्रवेश गरेको छ । चिली अंक विहीन हुदै समूह चरणबाट बाहिरिदा जापान उत्कृष्ट तेस्रो टोलीको रुपमा नकआउट चरणमा पुग्न सफल भएको छ ।

यस्तै समुह ‘जी’ को अष्ट्रेलिया उत्कृष्ट तेस्रो टोलीको रुपमा क्वाटरफाइनलमा प्रवेश गर्न सफल भएको छ । यो समूहबाट स्वीडेन समूह विजेता तथा अमेरिका उपविजेता बन्दै अघिल्लो चरणमा प्रवेश गरेको छ ।

क्वाटरफाइनल समिकरण
क्यानडाविरुद्ध ब्राजिल (३० जुलाई, दिउँसो १ः४५ बजे)
इंग्ल्यान्डविरुद्ध अष्ट्रेलिया (३० जुलाई, दिउँसो २ः४५ बजे)
स्वीडेनविरुद्ध जापान (३० जुलाई, दिउँसो ३ः४५ बजे)
नेदरल्यान्ड्सविरुद्ध अमेरिका (३० जुलाई, दिउँसो ४ः४५ बजे)