काठमाडौं (हाम्रो खेलकुद)
विभागिय टोली एपिएफले प्रधान सेनापति अन्तर्राष्ट्रिय महिला फुटबलको उपाधि रक्षा गरेको छ । सावित्रा भण्डारीले २ र अनिता बस्नेतले १ गोल गरेपछि मञ्माञ्चललाई ३–१ ले हराउँदै एपिएफले चौथो संस्करणको उपाधि जितेको हो ।
सेमिफाइनलमा आर्मीलाई टाइब्रेकरमा ३–१ ले हराउँदै अघि बढेको मध्यमाञ्चलले उपाधि उचाल्न भने सकेन । मध्यमाञ्चल पहिलो पल्ट प्रधानसेनापति कपको फाइनलमा पुग्ने क्षेत्रिय टोली हो ।
स्ट्राइकर सावित्राले २६औं मिनेटमा पहिलो गोल गरेकी थिइन् । सावित्राले ४२औं मिनेटमा अर्को गोल गर्दै एपिएफको अन्तरलाई दोब्बर पारेकी थिइन् । तर एपिएफकी अनिताले एक्लो प्रयासमा ८२औं मिनेटमा गोल गर्नुअघि निशा थोकरले मध्यमाञ्चलका लागि ६७ औं मिनेटमा गोल गरेकी थिइन् ।
१३ गोल गरेकी एपिएफकी सावित्रा प्रतियोगिताको सर्वोत्कृष्ट खेलाडी घोषित भइन्पुरस्कारमा स्कुटर प्राप्त गरिन् । अनिताले फाइनलको वमन अफ दी म्याच भइन् । प्रतियोगितामा एपिएफकी सरु लिम्बु उत्कृष्ट स्ट्राइकर, मध्यमाञ्चलकै निशा थोकर उत्कृष्ट रक्षक, आर्मीकी सुमित्रा योञ्जन उत्कृष्ट मिडफिल्डर, एपिएफका जनक सिंह उत्कृष्ट प्रशिक्षक चुनिए । उत्कृष्ट सबैले जनही १० हजार रुपैयाँ पाए ।
उपाधिसहित एपिएफले ३ लाख, मध्यमाञ्चलले १ लाख ५० हजार, सेमिफाइनल पुग्ने नेपाल पुलिस र आयोजक नेपाली सेनाको टोलीले समान ५० हजार रुपैयाँ प्राप्त गरे । विजयी खेलाडीलाई प्रधानसेनापती राजेन्द्र क्षेत्रीले पुरस्कृत गरेको थिए । घरेलु फुटबलमा सर्वाधिक पुरस्कार राशीको महिला प्रतियोगितामा ९ टोलीको सहभागिता थियो ।
