काठमाडौं (हाम्रो खेलकुद)– ए डिभिजन क्लब ब्रिगेड ब्वाइज क्लब (बिबिसी) को नयाँ कार्यसमिति सर्वसम्मत चयन भएको छ । शनिबार भएको २१ औं साधारण सभाले क्लबका अध्यक्षमा डा.लालकुमार पुनलाई चयन गरेको हो ।

क्लबको उपाध्यक्षमा राजु हाइजु, महासचिवमा स्मित लामा, सह–सचिवमा मीना कुमारी राई र कोषाध्यक्षमा अरभिन्द गुरुङ चुनिएका छन् । सदस्य हरेन्द्र भट्टराई, डा. विनय भट्टराई, सूर्य पोखरेल, अनुप बस्नेत, राजु श्रेष्ठ, योक बहादुर थापा, सनोज श्रेष्ठ र सन्दिप घिमिरे सर्वसम्मत चयन भए ।

साधरण सभामा आसन्न कात्तिक अन्तिमबाट सुरु हुने ‘ए’ डिभिजन लिगमा आफ्नो टोलीको तयारीका बारेमा छलफल भएको थियो । टोली निर्माण कार्य अन्तिम चरणमा पुगेको क्लबका कोषाध्यक्ष अरभिन्द गुरुङले जानकारी दिए ।औसतको टोली बनाएको बिबिसीले कात्तिक २९ गतेबाट सुरु हुने लिगमा शीर्ष १० को लक्ष्य राखेको छ ।

क्लबले राष्ट्रिय टोलीबाट कप्तानी गरिसकेका फरवार्ड अनिल गुरुङलाई नै कप्तानमा निरन्तरता दिएको छ । विदेशी खेलाडीमा क्यामरुनका रुडी बाकोप, बर्टरान्ड एबोडे र फाब्रिस मर्लिन अथासीलाई अनुबन्ध गरिसकेको छ । रुडीले नेपाल सुपर लिगमा चितवन एफसीका लागि खेलेका थिए ।

दक्षिण एसियाली कोटामा खेलाडी खोजी भइरहेको छ । बीबीसीमा रहेका ६ युवा खेलाडी जत तिवारी, शिशिर लेखी, दिपेश गुरुङ, विशाल बस्नेत, रोशन रानामगर र अल्विन पौडेल आउदो अक्टोवरमा ताजिकिस्तानमा आयोजना हुने एएफसी यु–२३ एसियन कप छनोटको प्रारम्भिक चरणमा बोलाइएको छ ।