एजेन्सी – क्याटलान क्लब बार्सिलोनाका युवा फरवार्ड अन्सु फातीले क्लबसँग सम्झौता नविकरण गरेका छन् । बार्सिलोनाले आफ्ना युवा स्टार फातीसँग ६ वर्षको नयाँ सम्झौता नविकरण गरेको हो ।
सम्झौता अनुसार फाती १८ वर्षीय फाती सन् २०२७ सम्म बार्सिलोनामै रहनेछन् । पछिल्लो सम्झौता अनुसार फातीको बार्सिलोनासँगको सम्झौता यो सिजनको अन्त्यसम्म रहेको थियो । क्लबले उनको रिलिज क्लज एक बिलियन युरो राखेको छ । गत साता मात्र पेड्रीले पनि क्लबसँग सम्झौता नविकरण गरेका थिए ।
क्लबका सदावहार अर्जेन्टिनी फरवार्ड लियोनेल मेस्सीको बर्हिगमनसँगै अर्थात मेस्सी युगको अन्त्यपछि बार्सिलोना ठुलो समस्याम परेको थियो । फातीको सम्झौतासँगै बार्सिलोनाका समर्थकलाई राहत महसुस भएको छ । गत सिजन चोटका कारण मैदान बाहिर रहेका फातीले यो सिजन चोटबाट पूनरागमन लगातार उच्च प्रदर्शन गरिरहेका छन् ।
प्रशिक्षक एर्नेस्टो भाल्भेर्डेले फातीलाई बार्सिलोनाको सिनियर टोलीमा डेब्यु गराएका थिए । उनी च्याम्पियन्स लिगमा डेब्यु गर्ने सबैभन्दा कान्छा खेलाडी तथा स्पेनिस ला लिगामा गोल गर्ने कान्छा खेलाडी हुन् ।
फातीलाई बार्सिलोनाको भविष्यको रुपमा हेरिएको छ । उनी रोनाल्ड कोम्यानको टोलीको महत्वपुर्ण हिस्सा बनिसकेका छन् । मेस्सीको प्रस्थानपछि नै क्लबले उनलाई १० नम्वरको जर्सी प्रदान गरेको छ ।
