काठमाडौं (हाम्रो खेलकुद) – ए डिभिजन लिगको साविक विजेता मच्छिन्द्र क्लबले नयाँ सिजनका लागि अजरबैजानका फरवार्ड नुर्लान नोभ्रुजोभ र डिफेन्डर सादिग गुलिएभलाई अनुबन्ध गरेको छ ।

केहि महिना अघि सम्पन्न नेपाल सुपर लिग (एनएसएल) मा ललितपुर सिटीका लागि खेलेका नुर्लानले नेपाली फुटबलमा पुनरागमन गर्ने भएका हुन् । उनीसँगै डिफेन्डर सादिग पनि टोलीमा अनुबन्धित भएका छन् । मच्छिन्द्रले तेस्रो विदेशी खेलाडीका रुपमा गत सिजन नै खेलेका मिडफिल्डर आन्द्रेस नियालाई अनुबन्ध गरेको छ ।

क्लबले अघिल्लो सातामात्र फरवार्ड विमल घर्तिमगरलाई अनुबन्ध गरेको थियो । विमलले मच्छिन्द्रसँग एक वर्षको लागि सम्झौता गरेका छन् । चोटका कारण झण्डै एक बर्ष देखि मैदान बाहिर रहेका विमल उपचारपछि चोटमुक्त हुँदै मच्छिन्द्रबाट लिग खेल्ने भएका हुन् । विमलको आगमनले टोलीको मनोवल उच्च हुने क्लबले जनाएको छ । कतार विश्वपकप छनोटका लागि राष्ट्रिय टिमको बन्द प्रशिक्षणमा गत पुसमा विमलको दायाँ घुँडामा चोट लोको थियो ।

मच्छिन्द्रले यसअघि मनिष डाँगी, सुनिल बलसँग सम्झौता गरिसकेको छ । रेजिन सुब्बा, विशाल राई, विशाल श्रेष्ठलगायतका पुराना खेलाडीसँग सम्झौता नविकरण गरिसकेको छ । क्लबले नयाँ सिजनका लागि प्रशिक्षक प्रवेश कटुवाललाई नै निरन्तरता दिएको छ ।