थ्री स्टारले मनाङलाई हरायो

काठमाडौं (हाम्रो खेलकुद) – सहिद स्मारक ए डिभिजन लिगको तयारीका लागि खेलिएको मैत्रीपूर्ण खेलमा थ्री स्टार क्लबले नेपाल आयल निगम मनाङ मर्स्याङ्दी क्लबलाई पराजित गरेको छ ।

सातदोबाटोस्थित एन्फा कम्प्लेक्सको मैदानमा भएको मैत्रीपूर्ण खेलमा थ्री स्टार २-१ ले विजयी भयो । थ्री स्टारको जितमा विजय भुजेल र निशान खड्काले गोल गरेका थिए । मनाङका लागि ओलावाले आफिजले बराबरी गोल फर्काएका थिए ।

थ्री स्टारले विजयको गोलमा अग्रता लिएको थियो । तर थ्री स्टारको गोलरक्षक प्रिसोले गल्ति गर्न पुग्दा ओलावाले पहिलो हाफमा नै मनाङलाई बराबरीमा ल्याउन सफल भए । दोस्रो हाफमा निशानले गोल गर्दै जित पक्का गरे । उनले पेनाल्टी क्षेत्रको ठिक बाहिर प्राप्त फ्रिकिकलाई गोलमा परिणत गरेका थिए ।

दुवै टोली आफ्ना केहि मुख्य खेलाडीबिना नै मैदान उत्रिएका थिए । थ्री स्टारका प्रशिक्षक उज्जन श्रेष्ठ र मनाङका राजेन्द्र तामाङले नयाँ खेलाडीलाई पनि प्रयोग गरेका थिए ।

थ्री स्टारको लिग तयारीस्वरूप खेलिएको दोस्रो खेल हो । यसअघि क्लबले गत शुक्रबार न्यु रोड टिम (एनआरटी) सँग ३-३ को बराबरी खेलेको थियो । मनाङले भने पहिलो मैत्रीपूर्ण खेल खेलेको हो ।