काठमाडौं (हाम्रो खेलकुद) – नेपाल यू-२३ राष्ट्रिय फुटबल टोलीका कप्तान तथा गोलरक्षक अर्पण कार्की र भारतीय मिडफिल्डर शेम मार्टन ए डिभिजन लिगको क्लब च्यासल युवा क्लबमा अनुबन्धित भएका छन् ।

क्लबले सोमबार एक विज्ञप्तिमार्फत दुई खेलाडी अनुबन्धनबारे जानकारी दिएको हो । अर्पणले भर्खरै सम्पन्न एएफसी यू-२३ एसियन कप छनोटमा नेपाल यू-२३ टोलीको कप्तानी सम्हालेका थिए । नेपालको विभिन्न उमेर समूहका लागि खेलेका उनले राष्ट्रिय टोलीको बन्द प्रशिक्षणमा पनि स्थान बनाइसकेका छन् ।

भारतीय मिडफिल्डर मार्टन भने भारतको चेन्नई सिटीबाट खेल्दै आएका थिए । उनले आइलिगका साथै एएफसी कपमा पनि एक खेल खेलेका छन् । प्राकृतिक रुपमा रक्षात्मक मिडफिल्डर मार्टनले डिफेन्समा पनि खेल्न सक्छन् ।

च्यासलले यसअघि इटालीका फरवार्ड विकास मेराग्लियालाई अनुबन्ध गरिसकेको छ । थप दुई विदेशी खेलाडीमा क्लबले क्यामरुनका २२ वर्षिय कित्वा यानिक र २५ वर्षीय मोउसा अबागानालाई पनि भित्र्याएको थियो ।

घरेलु खेलाडीमा क्लबसँग राष्ट्रिय टोलीका पूर्वकप्तान विराज महर्जन, डिफेन्डर कमल श्रेष्ठ, विनय श्रेष्ठ, चेतन थारु, लगायत खेलाडी छन् । क्लबले मुख्य प्रशिक्षकमा बालगोपाल साहुखल तथा प्राविधिक निर्देशकमा सक्टल्यान्डका ली मान्सनलाई अनुबन्ध गरेको छ ।