काठमाडौं (हाम्रो खेलकुद)– यसै महिना आयोजना हुने दोस्रो कृष्णप्रसाद भट्टराई स्मृति राष्ट्रिय कराते प्रतियोगिताका लागि कर्णाली प्रदेशबाट खेलाडी भएका छन् । महिला र पुरुष कुमुते तथा कतामा गरि २१ खेलाडी छनोट भएको कर्णाली प्रदेश कराते टेक्निकल कमिटी सुर्खेतले बुधबार जानकारी दिएको छ ।
छनोट हुने महिला खेलाडीमा एलिसा रास्कोटी मगर (४५ केजी), ममता नेपाली (५० केजी), प्रेयङ्का शाही (५५ केजी), प्रियंका शाही (६१ केजी), सन्जिता नेपाली (६८ केजी), शुष्मा नेपाली (६८ केजी माथि) छन् । एलिसाले एकल काता र टिम कातामा प्रतिस्पर्धा गर्नेछिन् । टिम कातामा ममता नेपाली, प्रेयंकाले प्रतिस्पर्धा गर्नेछिन् ।
छनोट हुने पुरुष खेलाडीमा ज्ञानेन्द्र सुनार (५० केजी), मिसन रास्कोटी मगर (५५ केजी), यज्ञबहादुर टमटा (६० केजी), सेशन बोहरा (६७ केजी), सन्तोष सिंह ठकुरी (७५ केजी), नरेश प्रकाश घर्ती (८४ केजी), समिर खत्री (८४ केजी माथि) रहेका छन् । एकल कातामा लक्ष्मणकुमार शाही तथा टिम कातामा लक्ष्मणसहित मिसन रास्कोटी मगर र ज्ञानेन्द्र सुनार रहेका छन् । कर्णाली प्रदेश टोलीको प्रशिक्षकमा प्रदीपकुमार राई र रमेश नेपाली छन् ।
गोदावरी नगरपालिकाको आयोजना हुने कृष्ण प्रसाद भट्टराई खेल महोत्सव २०७९ को अवसरमा नेपाल कराते महासंघ जिल्ला प्रमुख डोजो ललिपतुर र गोदावरी नगरपालिकाको संयुक्त आयोजनामा माघ २६ देखि २८ गते सम्म कृष्ण प्रसाद भट्टराई स्मृति राष्ट्रिय प्रतियोगिता सञ्चालन हुनेछ ।
प्रतियोगितामा ७ प्रदेश र ३ विभागका गरि १० टोलीको सहभागिता रहनेछ । महिलातर्फ ८ र पुरुषतर्फ ९ गरि १७ तौल समूहमा प्रतिस्पर्धा हुनेछ । राष्ट्रिय खेलकुद परिषद्को विषेश सहयोगमा हुने प्रतियोगिताको सहयोगीका रुपमा सम्झना ल्याब, लि निङ, क्लासिक डायमण्ड र उद्योग वाणिज्य संघ ललितपुर रहेका छन् ।
