काठमाडौं (हाम्रो खेलकुद)– यसै महिना आयोजना हुने दोस्रो कृष्णप्रसाद भट्टराई स्मृति राष्ट्रिय कराते प्रतियोगिताका लागि लुम्बिनी प्रदेशले खेलाडी छनोट गरेको छ । बिहीबार सम्पन्न दुई दिने छनोट प्रतियोगिताबाट महिलातर्फ ९ र पुरुषतर्फ १० खेलाडी छनोट भएका छन् ।

महिला ४५ केजीमा गीता विक, ५० केजीमा अनिता पुन मगर, ५५ केजीमा बर्षा बुढामगर, ६१ केजीमा रक्षा शाही ठकुरी, ६८ केजीमा सम्पदा केसी र ६८ केजी तौल भन्दा माथिको तौल समूहमा दिया थापा छनोट भएकी छिन् । एकल कातामा पुजा दर्नाल तथा टिम कातामा पुजासहित छायाँ गुरुङ र कविता थापा छानिएका छन् ।

पुरुषतर्फ अविनाश जिएम (५० केजी), राहुल चौधरी (५६ केजी), यमबहादुर समाल (६० केजी), निखिल गुरुङ (६७ केजी), प्रतिक कुवर (७५ केजी), अनिश पाण्डे ८४ केजी र नारायण गुरुङ ८४ केजीमाथिको तौल समूहमा छनोट भएका छन् । एकल कातामा आजादसिंह राना तथा टिम काता आजाद तथा किशन विक र हिमाल सुनार छानिएका छन् ।

गोदावरी नगरपालिकाको आयोजना हुने कृष्ण प्रसाद भट्टराई खेल महोत्सव २०७९ को अवसरमा नेपाल कराते महासंघ जिल्ला प्रमुख डोजो ललिपतुर र गोदावरी नगरपालिकाको संयुक्त आयोजनामा माघ २६ देखि २८ गते सम्म कृष्ण प्रसाद भट्टराई स्मृति राष्ट्रिय प्रतियोगिता सञ्चालन हुनेछ ।

प्रतियोगितामा ७ प्रदेश र ३ विभागका गरि १० टोलीको सहभागिता रहनेछ । महिलातर्फ ८ र पुरुषतर्फ ९ गरि १७ तौल समूहमा प्रतिस्पर्धा हुनेछ । राष्ट्रिय खेलकुद परिषद्को विषेश सहयोगमा हुने प्रतियोगिताको सहयोगीका रुपमा सम्झना ल्याब, लि निङ, क्लासिक डायमण्ड र उद्योग वाणिज्य संघ ललितपुर रहेका छन् ।