काठमाडौं (हाम्रो खेलकुद) – पारा तेक्वान्दो खेलाडी सृजना घिसिङ र प्रशिक्षक कविराज नेगी लामा आइतबार नगदसहित सम्मानित भएका छन् ।

नेपाल तेक्वान्दो संघले नव नियुक्त युवा तथा खेलकुद मन्त्री डिग बहादुर लिम्बुलाई स्वागत तथा शुभकामना कार्यक्रमको अवसरमा पारा खेलाडी सृजना र प्रशिक्षक कविराजलाई नगदसहित सम्मानित गरेको हो ।

संघले खेलाडी सृजनालाई १ लाख रुपैया र प्रशिक्षक कविराजलाई २५ हजार रुपैयाँ र सम्मानपत्रले सम्मानित गरेको हो । उनीहरुलाई युवा तथा खेलकुद मन्त्री डिग बहादुर लिम्बुले चेक तथा सम्मान पत्र प्रदान गरे ।

सृजनाले गत मंसिरमा साउदी अरेबियाको रियादमा भएको रियाद २०२२ वल्र्ड पारा तेक्वान्दो ग्राण्ड प्रिस फाइनल जि १० मा विश्व वरियतामा रहेका मेक्सिको, ब्राजिल र फाइनलमा टर्कीका खेलाडीलाई पराजित गर्दै नेपालका लागि ऐतिहासिक स्वर्ण प्रदक दिलाएकी थिइन् ।

उनको प्रशिक्षकमा कविराज थिए । यस्तै घिसिङले एसियाली युथ पारा खेलकुद २०२१ बहराईन र २०२२ इरानमा सम्पन्न भएको चौथौ डब्लुटि प्रेसिडेन्ट्स कप एशियन रिजनमा रजत पदक जितिसकेका छन् ।

सृजनासँगै पलेशा गोवर्धन, राम बहादुर अधिकारी, अमिर ब्लोन र लोकराज शाही चीनमा हुने हाङझाउ २०२२ एशियन पारा गेम्स र फ्रान्समा हुने पेरिस २०२४ पाराओलम्पिक गेम्सको लागि प्रशिक्षणमा रहेको प्रशिक्षक कविराज नेगी लामाले जानकारी गराए । प्रशिक्षक नेगीले सन् २०१५ देखि नेपाली राष्ट्रिय पारा तेक्वान्दो टिम सम्हाल्दै आएका छन् ।

उनी अन्तर्राष्ट्रिय अफिसियल प्रतियोगिताबाट नेपालको लागि कुल ८ वटा पदक हासिल गर्न सफल प्रशिक्षक हुन् । प्रशिक्षक लामाले पारा तेक्वान्दो खेलबाट हांग्जाउ २०२२ एशियन पारा गेम्स र पेरिस २०२४ पाराओलम्पिक गेम्सबाट पदकको ठुलो आशा गरेको जनाए ।