काठमाडौं (हाम्रो खेलकुद) – चौथो राष्ट्रिय खुला फ्रेन्डसिप तेक्वान्दो प्रतियोगिताबाट ६ खेलाडी दक्षिण कोरियाको सिओलमा अन्तर्राष्ट्रिय ओपन फ्रेन्डसिप तेक्वान्दो च्याम्पियनसिप (आइओएफटिसी) का लागि छनोट भएका छन् ।

कोरियामा अगष्ट २३ देखि २४ तारिखसम्म हुने आइओएफटिसीका लागि आइतबार ग्योरोगीमा ४ र एकल पुम्सेमा २ गरी ६ स्पर्धामा स्वर्ण पदक जितेका खेलाडी छनोट भएका हुन् ।

कोटेश्वर तेक्वान्दो डोजाङको आयोजना तथा नेप्लिज तेक्वान्दो एकेडेमी (एनटिए) को सह–आयोजनामा भएको प्रतियोगिताअन्तर्गत ग्योरोगीको पुरुष ६३–६८ केजीमा एनटीएका सुवासचन्द्र बोहरा पहिलो भए । उनले फाइनलमा एनटिएकै आयुश ढुंगेललाई पराजित गरे ।

पुरुष ५४–५८ केजीमा कोटेश्वरका एलिस ठकुरीले फाइनलमा आफ्नै डोजाङका मान्देव भाट क्षेत्रीलाई हराउदै पहिलो भए ।
त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा भएको प्रतियोगिताको महिला ४६–४९ केजीमा कोटेश्वर तेक्वान्दो डोजाङकी इशिका राणाले स्वर्ण पदक जितिन् ।

इशिकाले फाइनलमा चन्द्रागिरीकी सुमित्रा बलामीलाई पाखा लगाइन् । महिलाको ५३–५७ केजीमा चन्द्रागिरीकी सलिना धामी पहिलो भइन् । सलिनाले फाइनलमा चन्द्रागिरीकै रचना कुमाललाई पन्छाइन् । एकल पुम्सेको पुरुषमा एनटिएका भिजन ताामाङ तथा महिलामा कोटेश्वरकी सन्ध्या लामा पहिलो हुँदै छनोट भएका छन् । छनोटसंगै ६ खेलाडीले जनही ५० हजार रुपैयाँ प्राप्त गरे ।

एनटिए टिम च्याम्पियन
प्रतियोगितामा एनटिए टिम च्याम्पियन बन्यो । एनटिएले ११ स्वर्ण, ३ रजत र ५ कांस्य पदक जित्यो । ९ स्वर्ण, ४ रजत र ३ कांस्य पदकका साथ कोटेश्वर दोश्रो भयो । तेश्रो स्थानमा प्राप्त गरेको चन्द्रागिरीले ८ स्वर्ण, ६ रजत र ८ कांस्य पदक प्राप्त ग¥यो । विजेता टोलीले १ लाख, दोस्रोले ५० हजार र तेस्रो टोलीले २५ हजार रुपैयाँ प्राप्त गर्यो ।

प्रतियोगिताको प्रशिक्षकमा मोतिलाल लामा तथा निर्णायकमा सारदा धिमाल उत्कृष्ट भए । दुवैले जनही १० हजार नगद पुरस्कार पाए । विजेतालाई राष्ट्रिय खेलकुद परिषद्का सदस्य–सचिव टंकलाल घिसिङलगायतले पुरस्कृ गरे । प्रतियोगिताका लागि आइओएफटिसीका निर्देशक दिवाकर महर्जन पनि अमेरिकाबाट नेपाल आएका छन् ।