हेटौंडा (हाम्रो खेलकुद)- बागमती प्रदेश युवा तथा खेलकुद मन्त्रालयद्वारा आयोजित स्पोर्टस अवार्डमा विनोद महर्जनलाई उत्कृष्ट जिल्ला खेलकुद विकास समिति अध्यक्ष अवार्डबाट सम्मान गरिएको छ।

बागमती प्रदेशको राजधानी हेटौंडाको हुप्रा चौरमा आज आयोजित कार्यक्रममा महर्जनलाई यो अवार्ड प्रदान गरिएको हो। उनले ५० हजार रुपैयाँ पनि प्राप्त गरे।

खेल जीवन पश्चात पाएको अवसर र जिम्मेवारीलाई सकुशल निर्वाह गर्न सफल महर्जन ललितपुर जिल्ला खेलकुद विकास समितिका अध्यक्ष हुन्। किक बक्सिङका आफ्नो समयका च्याम्पियन महर्जनले दोस्रो पटक ललितपुर जिल्ला खेलकुद विकास समितिको अध्यक्षमा निरन्तरता पाएका हुन्।

महर्जनको नेतृत्वमा १३ वटा खेलहरु समावेश गरी ललितपुर जिल्ला बृहत खेलकुद महोत्सव आयोजना भएको थियो। उनले खेलाडी तथा प्रशिक्षकको लागि गरेको विभिन्न सम्मान र कार्यक्रमको फेरिस्ता लामै छ। जसमा खेलाडी सम्मान र प्रतियोगिताहरू प्रमुख रहेका छन्।

विभिन्न प्रतियोगिताहरूमा कृष्ण प्रसाद भट्टराई स्मृति राष्ट्रिय कराते प्रतियोगिताको पहिलो संस्करणदेखि चौंथो संस्करण सम्म सचिव पदको भूमिका निर्वाह गर्दै आएका छन्।

खेलकुद विकास अहोरात्र खटिएका महर्जनलाई बागमती प्रदेश युवा तथा खेलकुद मन्त्रालयले यो अवार्ड सहित सम्मान गरेको हो।

अवार्डमा यो पटक कुल ८ विधामा १३ खेलाडी तथा खेल व्यक्तित्वलाई अवार्ड र नगद सहित सम्मान गरिएको छ।