धनगढी (हाम्रो खेलकुद)- चैतन्य पाठशाला चैतन्य तेक्वान्दो डोजाङको आयोजना ‘तेस्रो सुदूरपश्चिम प्रदेशस्तरीय तेक्वान्दो प्रतियोगिता २०८२’ धनगढी बिहीवार सुरु भएको छ ।

आयोजक चैतन्य पाठशालाको फुटसल मैदान शिवनगरमा ३ दिन सम्म चल्ने प्रतियोगिताको नेपाल ओलम्पियन्स संघका अध्यक्ष दीपक विष्टको प्रमुख आतिथ्यतामा भयो ।

सुदूरपश्चिम प्रदेशका सबै जिल्लाका करिब २ सय भन्दा बढी खेलाडीको सहभागिता छ। चैतन्य पाठशालाका निर्देशक कटक बहादुर सिंहले विगतमा नगर तथा जिल्ला स्तरमा सफल प्रतियोगिता आयोजना गरेको अनुभवका आधारमा यस वर्ष प्रदेशस्तरीय प्रतियोगिता ल्याइएको जानकारी दिए ।

ओलम्पियन विष्टले वर्तमान समय तेक्वान्दो खेलमा पर्याप्त सामग्री र अवसर रहेको उल्लेख गर्दै यस्ता प्रतियोगिताले खेलाडीलाई थप हौसला प्रदान गर्ने बताए ।

‘हाम्रो देशमा विभिन्न स्तरका खेलाडी छन्। र उनीहरूले अवसर नपाउँदा मात्रै समस्या भइरहेको छ, उनले भने,’ ‘यसरी विद्यालय स्तरमा कार्यक्रम आयोजना गर्न सकेमा खेलाडीमा रहेको क्षमता प्रदर्शन हुनेछ।’

चैतन्यका अध्यक्ष गणेशप्रसाद जोशीले चैतन्यलाई शिक्षा र संस्कारको संगम र वेद तथा विज्ञानको संयोजनका रूपमा परिभाषित गर्दै समाजको समग्र विकासमा चैतन्यले उल्लेखनीय योगदान दिँदै आएको बताए।

कार्यक्रममा तेक्वान्दो प्रशिक्षक गोविन्द विष्ट, शेरवहादुर सिंह र मोहन प्रताप गुरूङलाई जनही १० हजारसहित सम्मान गरियो।

प्रतियोगिताको च्याम्पियन टोलीले ५०, दोस्रो टोलीले ३० र तेस्रो टोलीले २० हजार रुपैयाँ प्राप्त गर्नेछ । वेस्ट फाइटर पुरुष र महिलाले समान ५ हजार रुपैयाँ प्राप्त गर्नेछन्।

राष्ट्रिय क्रिकेट टोलीका पूर्व प्रमुख प्रशिक्षक जगत टमाटाज्यूले चैतन्य पाठशालाको चैतन्य स्पोर्टस एकेडेमीलाई खेल सामग्री समेत हस्तान्तरण गरे।