सुमन अधिकारी, बुटवल

लुम्बिनी प्रदेश दसौँ राष्ट्रिय हाप्किडो प्रतियोगिताको च्याम्पियन बनेको छ ।

बुटवलमा शनिवार सकिएको प्रतियोगितामा २१ स्वर्ण, १८ रजत र ३० कास्य पदक सहित लुम्बिनी विजेता बनेको हो ।

११ स्वर्ण, ९ रजत र २३ कास्य जित्दै सुदूरपश्चिम प्रदेश दोस्रो तथा ११ स्वर्ण, ४ रजत र १२ कास्य पदकसहित कोशी प्रदेश तेस्रो भयो ।

मिग्मा गुरुङ महिलातर्फ र प्रशन्त श्रेष्ठ पुरुषतर्फ प्रतियोगिताको सर्वोत्कृष्ट खेलाडी घोषित भए।

पुरुषमा हर्क बहादुर कामी उदीयमान र अनुशासित खेलाडी चुनिए । महिलामा अंकिता जिएम अनुशासित खेलाडी घोषित भइन्। पुरुषमा विशाल थापा र महिलामा रुपा बुढामगर उत्कृष्ट रेफ्री घोषित भए।

राष्ट्रिय खेलकुद परिषदका उपाध्यक्ष ध्रुव आचार्य, राखेपका सदस्य हिमाल श्रेष्ठ, नेपाल हाप्किडो संघका संस्थापक तथा अध्यक्ष काली बहादुर घर्तीमगर, एथलेटिक्स प्रशिक्षक मोहन घले लगायत विजेता खेलाडीलाई पुरस्कृत गरे।

३ दिन सम्म चलेको प्रतियोगितामा फाइटिङ, सेल्फ डिफेन्स तथा हाई फल र लङ फल अन्तरगतका इभेन्टहरूमा क्याडेट, जुनियर तथा सिनियर डिभिजनमा पुरुष तथा महिला तर्फ विभिन्न तौल, उमेर र बेल्ट अनुसार प्रतिस्पर्धा गराइएको थियो ।

प्रतियोगितामा ७ प्रदेशबाट छनोट भएका खेलाडी, प्रशिक्षक, रेफ्री, निर्णायकगरि करिब ३ सयको सहभागिता थियो ।