काठमाडौं (हाम्रो खेलकुद)- नेपाल कराते महासंघको आयोजनामा ५७ औँ राष्ट्रिय कराते प्रतियोगिता दोलखाको‌ चरिकोटमा हुने भएको छ।

महासंघको बिहीवार बसेको बैठकले राष्ट्रिय प्रतियोगिता
भदौको अन्तिम वा असोजको पहिलो साता आयोजना गर्ने निर्णय गरेको छ।

त्यस्तै महासंघले रिक्त महासंघमा कृष्ण गौतमदलाई नियुक्त गरेको छ । तत्कालीन कोषाध्यक्ष किशोर भट्टराई र सदस्य गोपाल महर्जनको राजीनामा स्वीकृत गरेको‌ छ ।

महासंघले अबदेखि दक्षिण एसियन कराते महासंघ (क्याडेट, जुनियर २१, सिनियर), एसियाली कराते महासंघ तथा विश्व कराते महासंघले आयोजना गर्ने सिनियर च्याम्पियनसिपमा सहभागी हुने खेलाडीका लागि भिसा शुल्क, दर्ता शुल्क, आवास तथा बसोबासको व्यवस्था महासंघले गर्ने र हवाई टिकटको खर्च सहभागी  बेहोर्ने निर्णय गरेको छ।

यसअघि अन्तर्राष्ट्रिय प्रतियोगितामा सहभागी खेलाडीले आधा र महासंघले आधा बेहोर्दै आएको थियो।

महासंघको विधान विपरीत कार्य गरेको पुष्टि भएकाले प्रशिक्षक प्रभाकर राणा र प्रविण राणालाई महासंघका कुनै पनि कार्यक्रम वा गतिविधिमा सहभागी हुन प्रतिबन्ध लगाउने निर्णय गरेको महासंघले जनाएको छ।

कोशी प्रदेश खेलकुद विकास बोर्डले खेलकुद विकास ऐन २०७७ विपरीत कराते महासंघलाई विघटन तथा पुनःगठन गर्ने कार्य गरेको देखिएले त्यो कार्य ऐनअनुसार नभएको भनी राष्ट्रिय खेलकुद परिषद्को ध्यानाकर्षण गराउने निर्णय पनि महासंघले गरेको छ।

त्यस्तै महासंघ अन्तर्गतका खेलाडी, प्रशिक्षक र पदाधिकारीको बीमा प्रक्रिया अगाडि बढाउन कोषाध्यक्ष गौतमलाई फोकल पर्सन तोकिएको छ।