काठमाडौं, फागनु १६
मित्र राष्ट्र युएसएको न्यूयोर्क शहरमा आयोजना हुने न्यूयोर्क अन्तर्राष्ट्रिय खुला कराँते च्याम्पियनसिपमा सहभागी हुन सागका स्वर्णधारी सुनिल लामा त्यसतर्फ प्रस्थान गर्ने भएका छन् । लामा सोमबार त्यसतर्फ प्रस्थान गर्नेछ ।
उनलाई आज एक समारोहका बीच राष्ट्रिय खेलकुद परिषदका सदस्य–सचिव केशव कुमार बिष्टले शुभकामनासहित विदाई गरे । प्रतियोगिता मार्च ५ र ६ तारिखमा आयोजना हुनेछ । स्वर्णधारी लामाले उक्त प्रतियोगितामा सहभागिता जनाउनुका साथै मार्च २३ देखि २७ तारिख सम्म आयोजना हुने युएस ओपन कराँतेमा समेत प्रतिस्पर्धा गर्ने बताए ।
प्रतियोगितापछि लामाले गोशिनरियो मार्सल आर्ट एन्ड फिटनेश स्टुडियो, न्यूयोर्कमा मार्च १ देखि डिसेम्बर ३१ तारिख सम्म कराँते प्रशिक्षण तथा उक्त समयमा आयोजना हुने प्रतियोगिताहरुमा समेत सहभागिता जनाउने जानकारी गराए ।
