काठमाडौं, फागुन २२
१२औं दक्षिण एसियाली खेलकुद (साग)की स्वर्णधारी निमा घर्तीमगरसहित विभिन्न अन्तर्राष्ट्रिय प्रतियोगिताहरुमा पदक जित्ने मगर खेलाडीहरु शनिबार सम्मानित भएको छ ।
मगर समाज सेवा समितिले शनिबार ललितपुरको टिकाथलीमा एक कार्यक्रम गर्दै अन्तर्राष्ट्रिय प्रतियोगितामा पदक जित्ने मगर खेलाडीलाई सम्मानित गरेको हो । सम्मानित हुनेमा १२औं दक्षिण एसियाली खेलकुद(साग)की स्वर्णधारी निमासहित आठौं सागमा स्वर्ण पदक जितेका बक्सिङ खेलाडी प्रकाश थापामगर र रामचन्द्र थापा मगरसँगैं १२ औं सागमा रजत पदक जितेका उसु खेलाडी विजय सिंजाली मगर, युवराज थापामगर र विश्व बुढामगर पनि सम्मानित भए ।
निमालाई सात हजार रुपैयाँ तथा विजय, युवराज र विश्वलाई दुई हजार पाँच सय रुपैयाँ प्रदान गरियो । सभामुख ओनसरी घर्तीले उनीहरुलाई सम्मान प्रदान गरिन् । सम्मन कार्यक्रममा नेपाल उसु संघका अध्यक्ष दिपक सरकार, कार्यक्रम संयोजक नेत्र बहादुर पुलामीमगर लगायतको उपस्थिति थियो ।
