काठमाडौं (हाम्रो खेलकुद)– पुराना कराते खेलाडी रवि महर्जनले १३ औं दक्षिण एसियाली खेलकुद (साग) को तयारी रहेको कराते टोलीलाई टि सर्ट प्रदान गरेका छन् ।
कर्मा कन्सट्रक्सनका तर्फबाट महर्जनले झन्डै ५० हजार बराबरको सहयोग गरेको बताइएको छ । कराते टोलीमा अहिले १ सय ८ खेलाडी १८ प्रशिक्षक सहित १ सय ३० जना रहेका छन् । महर्जनले मंगलबार करातेको प्रशिक्षस्थल सातदोबाटोको कराते हलमा पुगेर टिसर्ट प्रदान गरेका थिए ।
मंसिर १५ देखि २४ गते सम्म १३ औं सागका लागि नेपालले १३ औं साग आयोजना गर्दै छ । कराते नेपाली खेलकुदको सफल खेल मध्ये पर्दछ ।
सन् १९९९ मा नेपालमा पछिल्लो पटक आयोजना भएको आठौं सागमा नेपालले कराते र तेक्वान्दोमा प्राप्त गरेको सफलताकै कारण पदक तालिकामा पहिलो पटक दोस्रो स्थान हासिल गरेको थियो । त्यति बेला सागमा पहिलो पटक तेक्वान्दो र कराते समावेश गरिएको थियो ।
यसपटकको साग काठमाडौं र पोखरामा आयोजना गर्ने तयारी भइरहेको छ । महर्जनले यसपटक सागमा स्वर्ण जित्ने खेलाडीलाई नगद पुरस्कारसहित सम्मान गर्ने घोषणा पनि गरेका छन् ।
