काठमाडौं (हाम्रो खेलकुद) – स्वदेशमा आयोजना भएको १३औं दक्षिण एसियाली खेलकुद (साग) मा दोहोरो स्वर्ण पदक विजेता मन्डेकाजी श्रेष्ठ नेपाल प्रहरीको ड्युटीमा खटिएका छन् ।

हवल्दारसमेत रहेका मन्डेकाजीसहित सागकी अर्की स्वर्णधारी जुनी राईले पनि बिहीबारदेखि नै राष्ट्रिय प्रहरी प्रशिक्षण प्रतिष्ठान तालिम केन्द्र महाराजगन्जमा ड्युटी थालेका हुन् । कोरोना महामारीको त्रासका कारण गएको चैत ११ गतेदेखि लकडाउन हुँदा मन्डेकाजी व्यक्तिगत र सामूहिक पहलमा विपदमा परेकाहरुलाई खान खुवाउनेलागयतका अन्य काममा सलग्न हुँदै आएका थिए ।

कोरोना महामारीका कारण नेपालमा अझैपनि खेलकुद गतिविधि शुरु हुने अवस्था बनिसकेको छैन । सरकारले बुधबार मात्र खेलकुद गतिविधि अझै सुरु गर्न नमिल्ने सुचीमा राखेको थियो । यस्तो अवस्थामा विभाग (नेपाली सेना, नेपाल प्रहरी र सशस्त्र प्रहरी बल ) मा आबद्ध राष्ट्रिय खेलाडीहरु लकडाउन भएको दोस्रो हप्तादेखि नै ड्युटीमा खटिइसकेका छन् ।

मन्डे र जुनी राईलगायतका अन्य पदक विजेता खेलाडीले भने बिहीबार देखि ड्युटी शुरु गरेका हुन् । मन्डेले बिहीबार प्रहरीको बर्दीमा तस्वीरसहित राखेर लेखे ‘ड्युटी टाइम । सेवा नै धर्म । देशको छोरा । विषम परिस्थितिमा सेवा गर्नु पाउँदा आनन्द लाग्छ । सधैं जनताको साथमा छु । पहिले प्रहरी । अनि खेलाडी’।

मंसिरमा भएको १३ औं सागमा मन्डेकाजीले करातेको एकल काता र टिम कातामा स्वर्ण जितेका थिए । यस्तै उसुकी जुनी राईले महिला ५६ केजी तौल समूहमा स्वर्ण जितेकी थिइन् । नेपालका अधिकांश खेलका राष्ट्रिय खेलाडी विभागिय टोलीमा आबद्ध छन् ।