काठमाडौं (हाम्रो खेलकुद)– सशस्त्र प्रहरी बल (एपिएफ) नेपालले २१ औं सशस्त्र प्रहरी दिवसको अवसरमा आफू मातहतको खेलकुदमा सहयोग गर्ने संस्थान तथा व्यक्तिलाई सम्मान गरेको छ ।
आइतबार एपिएफ मुख्यालय हल्चोकमा आयोजित कार्यक्रममा खेल सामग्री उत्पादन कम्पनि केल्मी र अग्नी ग्रुपलाई कदर पत्रबाट सम्मान गरिएको हो । अग्नी ग्रुपले एपिएफको विभिन्न खेलकुद टोलीलाई प्रायोजन गर्दै आएको छ । केल्मीले भने एपिएफ क्लबका फुटबल र भलिबललाई प्रायोजनका साथै सहुलियत दरमा आफ्ना उत्पादन उपलब्ध गराई गरि सहयोग गर्दै आएकोमा कदर पत्र प्रदान गरिएको सशस्त्र प्रहरीले जनाएको छ ।
सशस्त्र प्रहरी बलका महानिरिक्षक शैलेन्द्र खनालले केल्मीका प्रबन्ध निर्देशक उत्तम न्यौपानेलाई कदर पत्र प्रदान गरेका थिए । केल्मीले राष्ट्रिय महिला र पुरुष भलिबल टोलीलाई प्रायोजन गर्दै आएको छ ।
त्यसैगरि सोही अवसरमा एपिएफले खेलकुद प्रशासनमा रहि उत्कृष्ट कार्य गरेकोमा सशस्त्र प्रहरी निरिक्षक विजय केसीलाई पुरस्कृत गरेको छ । भलिबलका एसियन क्याडिडेन्ट रेफ्री समेत रहेका केसी एपिएफको फुटबल तथा भलिबल टोलीका व्यवस्थापक पनि हुन् ।
