काठमाडौं (हाम्रो खेलकुद) – नेपालको पब्जी टोली ट्रेन्ड टु किल (टि२के) पब्जी मोबाइल ग्लोबल च्याम्पियनसिपको अन्तिम चरणमा छनोट भएको छ ।

आइतबार सम्पन्न पहेंलो समूहको खेलमा समग्रमा तेस्रो स्थान हासिल गर्दै टि२केले अन्तिम चरणमा स्थान बनाएको हो । यसअघि नेपालबाट सहभागी द रियल सोल्जर्स (डिआरएस) र स्काइलाइट्ज गेमिङले भने शीर्ष ११ मा रहँदै सर्भाइभल चरणका लागि छनोट भएको थियो ।

आइतबार टि२केले कुल २ सय १४ अंक जोड्दै शीर्ष ३ मा‌ पर्न सफल रह्यो । जापानको रिजेक्ट टोली र टि२केको समान अंक भएपनि प्लेसमेन्ट अंकका आधारमा टि२के अघि बढ्न सफल भयो ।

यसअघि डिआरएसले रातो समूहमा १ सय ८२ अंकसहित छैटौं स्थान हासिल गरेको थियो । स्काइलाइट्ज भने १ सय ७६ अंकसाथ नवौं भएको थियो ।

मलेसियाको कुआलालम्पुरमा सम्पन्न समूह चरणबाट शीर्ष तीन टोलीले सिधै अन्तिम चरणमा स्थान बनाएका छन् । अन्तिम चरण अर्को वर्ष जनवरीमा जकार्तामा हुनेछ । त्यस्तै हरेक समूहबाट चौथो देखि ११ औं स्थान हासिल गर्ने टोलीले सर्भाइभल स्टेज खेल्दै फाइनल पुग्ने अर्को अवसर पाउनेछन् । सर्भाइभल चरण नोभेम्बर ३० देखि सुरु हुनेछ ।

हरेक समूहका पुछारका ५ टोली भने बाहिरिए । सहभागी ४८ टोलीलाई रातो, हरियो र निलो समूहमा विभाजन गरिएको थियो ।