काठमाडौं (हाम्रो खेलकुद) – फुटबलका अन्जन विष्ट र भलिबलकी उषा भण्डारी पल्सर स्पोर्टस अवार्डको दोहोरो विधाको मनोनयमा परेका छन् । अन्जन र उषा यसअघि नै सार्वजनिक भएको पिपल्स च्वाइस अवार्डको मनोनयमा परेका थिए ।

अर्को साता आयोजना हुने अवार्डको विभिन्न ४ विधाको मनोनय सार्वजनिक हुँदा अन्जन र उषा फरक फरक विधामा मनोनयमा परेका छन् । वर्षको उत्कृष्ट पुरुष खेलाडीको मनोनयमा अन्जनसँगै क्रिकेटका कुशल भुर्तेल, दीपेन्द्र सिंह ऐरी, फुटबलका किरण चेम्जोङ र ब्याडमिन्टनका प्रिन्स दहाल परेका छन् ।

वर्षको युवा खेलाडीमा उषासँगै फुटबलका मनिष डाँगी र प्रीति राई, बक्सिङका छिरिङ वाङ्दी र ब्याडमिन्टनकी रसिला महर्जन परेका छन् । अवार्डको आयोजक नेपाल खेलकुद पत्रकार मञ्चले ४ विधाको मनोनयन मंगलबार पत्रकार सम्मेलनमार्फत सार्वजनिक गरेको हो । सार्वजनिक भएका अन्य दुई विधामा वर्षका उत्कृष्ट महिला खेलाडी र प्रशिक्षक छन् ।

उत्कृष्ट महिला खेलाडीको विधामा क्रिकेटकी रुविना क्षेत्री, सीता रानामगर, भलिबलकी अरुणा शाही, बक्सिङकी पुनम रावल, एथ्लेटिक्सकी पुष्पा भण्डारी मनोनयन परेका छन् । मन्चका सचिव अन्जन खड्काको नेतृत्वमा रहेको पाँच सदस्यीय खेलाडी छनोट समितिले २०७८ मा उत्कृष्ट नतिजा दिलाएका खेलाडी र प्रशिक्षक छनोट गरेको बताइएको छ ।

वर्षको उत्कृष्ट प्रशिक्षकको मनोनयमा बक्सिङका दीपक महर्जन, फुटबलका अब्दुल्ला अल्मुताइरी, पारा तेक्वान्दोका कविराज नेगी लामा, क्रिकेटका डेभ ह्वाटमोर र भलिबलका जगदीश भट्ट रहेका छन् । मञ्चले अवार्डको १९ औं संस्करण फागुन २३ गते काठमाडौंको कमलादीस्थित प्रज्ञा प्रतिष्ठनमा आयोजना गर्दैछ ।

यसअघि सार्वजनिक भइसकेको पिपल्स च्वाइस अवार्डको विधामा अन्जन र उषाका साथ क्रिकेटका आसिफ सेख, पौडी डुवाना लामा र टेनिसकी अभिलाषा विष्ट मनोनयनमा परेका थिए । अन्य विधा पारा एथलिट सम्मान, स्पेसल अवार्ड, लाइफटाइम एचिभमेन्ट अवार्ड र एसियन स्पोट्स जर्नालिस्ट अवार्डको विजेता भने अवार्ड कार्यक्रमकै दिने घोषणा गरिने मन्चले जनाएको छ ।

वर्ष पुरुष, महिला, युवा, पिपुल्स च्वाइस र प्रशिक्षक गरी पाँच विधाका विजेताहरूले पल्सर मोटरसाइकल पुरस्कार प्राप्त गर्नेछन् । अन्य विधाका विजेताहरूले नगद पुरस्कार प्राप्त गर्नेछन् । पिपल्स च्वाइस विधाको मनोनयनमा परेका खेलाडीलाई समर्थकहरूले विद्युतीय भुक्तानीको सेवाप्रदायक कम्पनी ई–सेवामार्फत मतदान गर्न सक्नेछन् । त्यसको मतभार ५० प्रतिशत हुनेछ ।

त्यस्तै एनएसजेएफ पल्सर स्पोर्ट्स अवार्डको आधिकारिक फेसबुक पेजमा गएर आफूलाई मनपर्ने खेलाडीको फोटोमा लाइक गरेर पनि मतदान गर्न सकिनेछ । यसको मतभार २५ प्रतिशत हुनेछ । त्यसबाहेक खेल पत्रकार र राष्ट्रिय प्रशिक्षकहरूले पनि मतदान गर्नेेछन् । खेल पत्रकार र राष्ट्रिय प्रशिक्षकले गर्ने मतदानको मतभार समान १२.५ प्रतिशत हुनेछ । मनोनयनमा परेका खेलाडीलाई फागुन २१ गते राति १२ बजेसम्म मतदान गर्न सकिने मन्चले जनाएको छ ।