काठमाडौं (हाम्रो खेलकुद)– नेपाल ओलम्पिक कमिटी (एनओसी) को आयोजनामा दुई दिने स्पोर्टस लिडर्स समिट काभ्रेको धुलिखेलमा शुक्रबार सुरु भएको छ । प्रधानमन्त्री पुष्पकमल दहालले भिडियोमार्फत समिटको उद्घाटन गरेका थिए । उनले समिटमा हुने छलफलले नेपाली खेलकुदलाई दिशानिर्देश गर्न मद्दत पुग्ने विश्वास लिएको बताए ।

पहिलो दिन राष्ट्रिय खेलकुद विकास ऐन २०७७ र नियमावली २०७९ कार्यन्वयनपछिको खेलकुदको अवस्थाका बारेमा समिक्षा भएको थियो । वरिष्ठ अधिवक्ता लोकभक्त रानाले सहजिकरण गरेको त्यो सेसनमा सहभागिहरुले ऐन कार्यान्वयनपछि खेलकुदमा उत्पन्न भएका कठिनाईका बारेमा आ आफ्नो अनुभव साटेका थिए ।

प्रदेश खेलकुद विकास परिषद्ले आ आफ्ना् प्रदेशमा परेको अप्ठेरोको बारेमा चर्चा गरेका थिए । दोस्रो दिन शनिबार खेलकुदको प्राथमिकता, खेल भौतिक पूर्वाधार, खेल प्रदर्शन र मनोविज्ञान, खेल सुरक्षा, ओलम्पिक अभियान, एन्टी डोपिङ र लैगिक समानताबारे चर्चा हुने एनओसीले जनाएको छ । यी विषयमा अन्र्तराष्ट्रिय ओलम्पिक कमिटी र ओलम्पिक काउन्सिल अफ एशियाका प्रतिनिधीहरु र नेपाली खेलकुद संग आवद्ध व्यक्तिहरुले आफ्नो प्रस्तुती दिने बताइएको छ ।

एनओसीले कमिटीले यस प्रकारको कार्यक्रम पहिलो पटक आयोजना गरेको जनाएको छ । कार्यक्रममा युवा तथा खेलकुद मन्त्रालय, सामाजिक विकास मन्त्रालय, राष्ट्रिय खेलकुद परिषद, प्रदेश खेलकुद परिषद, नेपाल ओलम्पिक कमिटीससँग आवद्ध संघका प्रतिनिधि तथा खेल पत्रकार गरि झण्डै सय जनाको सहभागिता रहेको छ ।