काठमाडौं (हाम्रो खेलकुद)– नेपाल राष्ट्रिय तथा अन्तर्राष्ट्रिय खेलाडी संघले नवौं राष्ट्रिय खेलकुदका स्वर्ण पदक विजेता खेलाडीलाई दिने भनिएको नगद पुरस्कार छिटो उपलब्ध गराउनु पर्नेसहित ३ बुँदे माग पत्र राष्ट्रिय खेलकुद परिषद् (राखेप) को नेतृत्वलाई बुझाएको छ ।
अध्यक्ष दीपक श्रेष्ठको नेतृत्वमा रहेको खेलाडी संघको टोलीले राखेपका सदस्य सचिव टंकलाल घिसिङलाई माग पत्र हस्तान्तरण गरेका थिए । नवौं राष्ट्रिय खेलकुद कात्तिकमा गण्डकीमा सम्पन्न भएको थियो ।
नवौं राष्ट्रिय खेलकुदमा स्वर्ण पदक विजेता खेलाडीहरुलाई बृहत राष्ट्रिय खेलकुदको कार्यविधिमा उल्लेख भए वमोजिम प्रदान गरिने नगद पुरस्कार रकम तुरुन्त उपलब्ध गराउनु पर्ने, १९ औं एशियाली खेलकुद आगामी सेप्टेम्वरमा हुने भएकोले खेलाडीहरुको तयारी प्रशिक्षण तत्काल संचालन गर्नु पर्ने माग राखेको छ ।
त्यस्तै साग स्वर्ण, एशियाली खेलकुदमा पदक विजेता र ओलम्पियन खेलाडीहरुले विगतमा पाउँदै आएको प्रोत्साहन भत्ता यथाशिघ्र उपलब्ध गराउन संघले जोडदार माग गरेको छ ।
