काठमाडौं (हाम्रो खेलकुद) – विभागीय नेपाल एपिएफ क्लबले छैटौं ढोरपाटन पुरुष भलिबल च्याम्पियनसिपमा दोहोरो जित दर्ता गरेको छ ।
नयाँ बसपार्कस्थित ढोरपाटन भलिबल प्रशिक्षण केन्द्रको मैदानमा मंगलबारदेखि शुरु भएको च्याम्पियनसिपमा उपाधि दावेदार एपिएफले न्युटन भलिबल एकेडेमी र आयोजक ढोरपाटनमाथि समान ३–० को सोझो सेटमा पराजित गर्दै दोहोरो सफलता हात पारेको हो ।
पहिलो खेलमा एपिएफले न्युटनमाथि २५–२०, २५–१८ र २५–१५ को तथा दोस्रो खेलमा ढोरपाटनमाथि २५–१३, २५–१५ र २५–२१ को सोझो सेटमा जित निकाल्यो ।
अर्काे खेलमा विभागीय त्रिभुवन आर्मी क्लबले नेपाल गणतान्त्रिक खेलकुद महासंघलाई २५–१७, २५–१७ र २५–२० ले पराजित गर्दै विजयी सुरुरुवात गरेको छ । आर्मीसँग पराजित भएको गणतान्त्रिकले हिम रश्मी हाई स्कुलमाथि २५–२०, २९–२७ र २५–१८ को जित दर्ता गरेको छ ।
च्याम्पियनसिपमा ११ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ । हरेक समूहका शीर्ष दुई टोलीले सेमिफाइनलमा स्थान पक्का गर्नेछ । फाइनल २२ चैतमा हुनेछ । च्याम्पियनसिपमा बुधबार चार खेल हुनेछ ।
च्याम्पियनसिपको प्रतिनिधि सभा सदस्य तथा प्रभु ग्रुपका अध्यक्ष देवी भट्टचन, बडिगार्ड गाउँपालिकाकी अध्यक्ष गण्डकी थापा, ढोरपाटन नगरपालिकाका उपमेयर कल्याण कायतलगायतले उद्घाटन गरे ।
च्याम्पियनसिपको विजेताले २ लाख ५० हजार, कप र मेडल प्राप्त गर्नेछ । दोस्रो हुनेले १ लाख २५ हजार, कप र मेडल प्राप्त गर्नेछ । तेस्रो हुनेले ६५ हजार, कप र मेडल प्राप्त गर्नेछ । च्याम्पियनसिपको सर्वाेत्कृष्ट खेलाडीले १० हजार रुपैया प्राप्त गर्नेछ ।
व्यक्तिगत विधातर्फ स्पाइकर, सेटर, ब्लकर, सर्भर, डिफेन्डर र प्रशिक्षकले समान ५ हजार रुपैयाँ प्राप्त गर्नेछ । प्रशिक्षण ट्रेनिङ गरेका प्रशिक्षकलाई मात्रै उत्कृष्ट प्रशिक्षक प्रदान गरिने आयोजकले जनाएको छ ।
