काठमाडौं (हाम्रो खेलकुद) – नेपाल बुद्धिचाल महासंघ र लुम्बिनी इभेन्ट म्यानेजमेन्टको संयुक्त आयोजनामा नेसनल चेस च्याम्पियनसिप काठमाडौको लाजिम्पाट स्थित होटल ले हिमालयमा मंगलबार सुरु भएको छ ।

खुल्लातर्फ उच्च रेटेड खेलाडी फिडे मास्टर रुपेश जैशवाल , अर्का फिड मास्टर क्षितिज भण्डारी ,पूर्व नेपाल च्याम्पियन सूरविर लामा, झापाका राजन सुवेदी युवा खेलाडी पुरुषोत्तम सिलवालले जित हासिल गरेका छन् । रुपेशले झापाका प्रकाश नेपाललाई, क्षितिजले ललितपुरका राजन पुरीलाई, सुरविरले केशव श्रेष्ठलाई , राजन सुवेदीले पुरुषोत्तम चौलागाईंलाई र पुरुषोत्तमले दोलखाका राजिव कार्कीलाई हराए ।

महिला र खुल्ला गरि दुई विधामा भएको प्रतियोगितामा महिलातर्फ पहिलो वरियताकी फिडे मास्टर सुजना लोहनी, शान्ति धिमाल, धिमाल, शुसिला गुरुङले पहिलो चरणको खेलमा बाजी मारेका छन् । सुजनाले मार्सल तामाङलाई, शान्तिले पूर्व नेपाल च्याम्पियन समेत रहेका काठमाडौका सिन्दिरा जोशीलाई र शुसिलाले झापाका पुनम प्रसाईंलाई पराजित गरिन् ।

केही महिना अघि नेसनल ’बि’ सम्पन्न गरि पहिलो पटक राउन्ड रोबिनको आधारमा आयोजना गरिएको नेसनल चेस च्याम्पियनसिप २०२३ को राष्ट्रियसभाका अध्यक्ष गणेशप्रसाद तिमिल्सिनाले उद्घाट गरेका थिए । च्याम्पियनसिप वैशाख १० गते सम्म संचालन हुनेछ ।

च्याम्पियनसिप बिजेता खेलाडीले वैशाख १८ गते बंगलादेशमा सुरु हुने ३.२ जोनल च्याम्पियनसिपमा प्रतिस्पर्धा गर्नेछन् । च्याम्पियनसिपको मुख्य प्रायोजन दिब्यांश मल्टी प्रोडक्सनले र सहप्रायोजक रुक्मिणी टुर्स एण्ड ट्राभल्सले गरेको छ । प्रायोजकमा नेपाल टेलिकम, वर्ल्ड लिन्क कम्युनिकेसन रहेको महासंघले जनाएको छ ।