दोलखा (हाम्रो खेलकुद) –पूर्व मन्त्री भीमबहादुर तामाङको स्मृतिमा दोलखा चेस होम नेपाल दोलखाको आयोजना तथा भीमबहादुर तामाङ स्मृति प्रतिष्ठानको सहयोगमा संचालन भइरहेको दोलखा खुला अन्तर्राष्ट्रिय बुद्धिचाल प्रतियोगितामा छैटौं चरणको समाप्तीमा नेपाली पुरुषोत्तम सिलवाल भारतीय खेलाडीका साथ संयुक्तरुपमा शीर्षस्थानमा रहेका छन् ।

तेस्रो दिन आइतबार १४ बर्षिय पुरुषोत्तम सिलवालले उत्कृष्ट प्रदर्शन गर्दै साढे ५ अंक जोडेका छन् । पुरुषोत्तम भारतका इन्द्रजित महिन्द्रकार र अंकित नारायण विश्वाससंग संयुक्त अग्रता लिएका छन् । पुरुषोत्तमले छैटौं चरणको खेलमा पुर्व नेपाल च्याम्पियन पुरुषोत्तम चौलागाईंलाई माथ दिए भने पाँचौ चरणको खेलमा भारतका इन्द्रजित महिन्द्रकारसंग बराबरी खेले । इन्द्रले छैटौं चरणको खेलमा भारतकै धनविर सिंहलाई निरास बनाए ।

अंकित नारायणले दुवै खेलमा जित निकाले। उनले पाँचौ चरणको खेलमा भारतका भेदान्त नगरकाटेलाइ पराजित गरे भने छैटौं चरणको खेलमा नेपालका सुशरत दाहाललाई हराए । नेपाल च्याम्पियन फिडे मास्टर रुपैश जैसवाल , पुर्व नेपाल च्याम्पियन नवीन तण्डुकार , भारतका अपोलोसना मनाङ, चारु मजुम्दार,प्रियान्सु बरुवा , मोहित कुमार ५ अंक सहित संयुक्तरूपमा दोस्रो स्थानमाब छन् ।

त्यसैगरी पुरुषोत्तम चौलागाईं , भारतका कृष्ण कुमार , रोशन थापा साढे ४ अंंक सहित सयुक्तरुपमा तेस्रो स्थानमा छन् ।दोलखाको कालिन्चोक माध्यमिक स्कुलमा भइरहेको प्रतियोगिता को सोमबार सातौं र आठौं चरणको खेल हुनेछन् ।