लतिलपुर (हाम्रो खेलकुद)– साउथ एसियन बुद्धिचाल च्याम्पियनसिपको तेस्रो दिन शुक्रबार पाँचौं चरणको समाप्तीमा पनि भारतीय २४१४ रेटेड इन्टरनेसनल मास्टर नुबैर शाह शेखले आफ्नो अग्रतालाई कायम राखेका छन् । उनले ५ खेलको समाप्तीमा साढे ४ अंक जोड्दै एकल अग्रतालाई यथावत राखेका हुन् ।

नेपाल बुद्धिचाल महासंघको आयोजनामा जारी च्याम्पियनसिपमा भारतीय ग्रान्ड मास्टर २५०८ रेटेड सयतन दास र पाकिस्तानी फिडे मास्टर २०४६ रेटेड अमिर करिम ४ अंकका साथ संयुक्त रुपमा दोस्रो स्थानमा छन् । नुबैरलाई चौथौं चरणको खेलमा नेपाल च्याम्पियन फिडे मास्टर २१४६ रेटेड रुपेश जैसवालले बराबरी गरे । नुबैरले पाँचौ चरणको खेलमा पूर्व नेपाल च्याम्पियन २०३२ सुरवीर लामालाई पराजित गरेका छन् ।

रुपेशले नुबैर बीच भएको निकै प्रतिस्पर्धात्मक खेलमा कालो गोटी लिएर खेल सुरुवात गरेका थिए । खेलको मध्य भागसम्म पुग्दा खेल कठिन मोडमा पुगे । दुबै खेलाडीले खतरा मोल्न चाहेनन् र खेलको ३९ औं चालमा बराबरी गर्न दुबै सहमत भए। सुरवीरले नुबैरलाई राम्रो टक्कर दिए पनि खेलको ४४ औं चालमा खेल त्याग्न बाध्य भए । खेलमा उच्च वरियताका भारतका ग्रान्ड मास्टर सयतनको लागि चाौथौं र पाँचौ चरणको खेल सुखद रह्यो ।

सयतनले चौथो चरणको खेलमा बंगलादेशका २११३ रेटेड अब्दुल मलेक मोहमदलाई पराजित गरे भने पाँचौ चरणको नेपालका फिडे मास्टर २०२८ रेटेड क्षितिज भण्डारीलाई माथ दिए । त्यसैगरी पाकिस्तानी खेलाडी २०४६ रेटेड अमिरले पनि दुबै खेलमा सफलता हात पारे । उनले पाँचौ चरणको खेलमा नेपालका १८२८ रेटेड पुरुषोत्तम सिलवाललाई माथ दिए भने त्यसअघिको खेलमा बंगलादेशका फिडे मास्टर २२१२ रेटेड हसन पराग मोहमदलाई निरास बनाए ।

ललितपुरको गोदावरी स्थित होटेल भ्यु भृकुटीमा जारी च्याम्पियनसिपमा नेपालका रुपेश जैसवाल , क्षितिज भण्डारी र बंगलादेशका हसन पराग मोहम्मदले साढे २ अंक जोडेका छन् । पुरुषोत्तम सिलवाल र अब्दुल मलेक मोहम्मदको २ अंक छ ।

महिलामा शाक्षीको अग्रता

महिलातर्फ तेस्रो र चौथो चरणको खेल सम्पन्न हुँदा भारतीय इन्टरनेशनल मास्टर २२२५ रेटेड साक्षी आनान्दले ४ अंकका साथ एकल अग्रतालाई कायम राखेकी छिन् । १९१३ रेटेड बंगलादेशका डिफेन्डिङ च्याम्पियन वहिदा वादिफा ३ अंक सहित दोस्रो स्थानमा छिन् ।

साक्षीले चौथो चरणको खेलमा दोस्रो चरणको खेलसम्म संयुक्त अग्रता लिएकी बंगलादेशका वदिफा अहमद माथी बाजि मारिन् । उनले तेस्रो चरणको खेलमा माल्दिभ्सकी नुहा रिजवानसंग वाक ओभर पाइन् । वादिफाले चौथौ चरणको खेलमा नेपालका १३३६ रेटेड शुसिला गुरुङलाई पराजित गरिन् ।

महिला राष्ट्रिय विजेता फिडे मास्टर १७५३ रेटेड सुजना लोहनी र १८५२ रेटेड जन्नतउल फेडोस साढे २ अंक हासिल गरिल संयुक्तरूपमा तेस्रो स्थानमा छन् । सुजनाको लागि तेस्रो र चौथो चरणको खेल राम्रो रह्यो । उनले तेस्रो चरणको खेलमा रिया श्रेष्ठलाई हराइन भने चौथो चरणको खेलमा बंगलादेशकी जन्नतउलसंग बराबरी खेलिन् । नेपालका शान्ति धिमाल र रिया श्रेष्ठलेले २ अंक जाडेकी छन् ।

छ दिनसम्म संचालन हुने प्रतियोगिताको लागि राष्ट्रिय खेलकुद परिषद , ललितपुरका स्थानीय निकायहरु ललितपुर महानगरपालिका , महालक्ष्मी नगरपालिका, गोदावरी नगरपालिका , कोन्जोसम गाउँपालिका, बागमती गाउँ पालिका, महाँकाल गाउँ पालिका र ललितपुर जिल्ला समन्वय समितिको सहयोग रहेको छ ।