विजय नेपाली, पोखरा

प्रथम खुल्ला सेभेन ए साइड फुटबल प्रतियोगितामा पहिलो चरणका खेलहरु सम्पन्न भएका छन् । एट टु नाइन गाइजको आयोजनामा पोखरा महानगरपालिका १३ माछापोखरी जारी प्रतियोगिताको शनिबारको पहिलो खेलमा गन्नी फुटबल क्लबले आयोजक एट टु नाइनलाई २–० ले हरायो ।

दोस्रो खेलमा नदीपुर एफसीले पसगाउँ समाजलाई ३–२ गोलअन्तरले हराउँदै क्वाटरफाइनलमा प्रवेश गरेको छ । तेस्रो खेलमा रामघाट गुम्बाले म्याग्दी फुटबल क्लबलाई २–० ले पराजित गर्यो । चौथो खेलमा भुजुङले नेभरमिटलाई २–० ले हरायो । पाँचौ खेलमा विवाईसी ३३ ले लोटसलाई ३–० ले पराजित गर्न सफल भयो । छैटौं खेलमा भ्रदकालीले जेम्स फुटबल क्लबलाई ४–० ले हरायो ।

सातौं खेलमा कमलपोखरीले रामघाट गुम्बा बी लाई टाइब्रेकरमा २–१ गोलले हरायो । निर्धारित समयको खेल गोलरहित बराबरीमा सकिएपछि खेल टाइब्रेकरमा गएको थियो । अन्तिम खेलमा गेमशालाले रामघाट गुम्बा ए लाई २–० ले हरायो । आइतबारबाट प्रिक्वाटरफाइनलका खेल सुरु हुनेछन् ।

फुटबल तथा रग्बी खेलाडी यशोदा बोहोराको सहयोगार्थ प्रतियोगिता आयोजना गरिएको संयोजक लोक गुरुङले बताए । यशोदा नेपालमा भएको यु–२० एसिया रग्बी सेभेन्सको तयारीको प्रशिक्षणका दौरान घाइते भएकी थिइन् ।

यशोदा यु–१५ साफ महिला फुटबल च्याम्पियनसिपमा नेपालले स्वर्ण जितेको टोलीकी हुन् । प्रतियोगिताबाट बचत भएको रकम यशोदालाई प्रदान गरिने बताइएको छ । प्रतियोगिताको विजेताले उपाधिसहित १ लाख र दोस्रो हुने टोलीले ६० हजार रुपैयाँ प्राप्त गर्नेछ ।