काठमाडौं (हाम्रो खेलकुद) – हेराकाजी महर्जन नेपाल बुद्धिचाल महासंघको कार्यवाहक अध्यक्षमा चयन भएका छन् । महासंघको कार्यसमितिको नवौं बैठक अघि अध्यक्ष विदुर प्रसाद गौतमले कार्य व्यस्तताको कारण देखाएर वरिष्ठ उपाध्यक्ष रहेका महर्जनलाई राजीनामा पत्र हस्तान्तरण गरेका थिए ।

गौतमको समेत उपस्थिति रहेको बैठकले राजीनामाको स्वीकृति गर्दै महासंघ विधान बमोजिम अध्यक्षले गर्ने सम्पूर्ण कार्यकारी अधिकार सहित महर्जनलाई महासंघको कार्यवहाक अध्यक्ष चयन गरेको महासंघले जनाएको छ । अध्यक्ष गौतमले कार्यव्यस्तताको कारणले राजिनामा दिए पनि आफूले भ्याएसम्म महासंघलाई सहयोग गर्ने प्रतिबद्धता व्यक्त गरेको महासंघले जनाएको छ ।

२०५५ सालमा बुद्धिचाल खेलाडी भएर खेल जीवन सुरु गरेका महर्जन २०६२ सालमा हेरा बहादुर स्थापित अध्यक्ष रहँदा पहिलो पटक कार्य समितिमा प्रवेश गरेका थिए । त्यसपछि उनी संघको सचिव , महासचिव , उपाध्यक्ष हुँदै २०८० वैशाखमा सम्पन्न साधारणसभाबाट वरिष्ठ उपाध्यक्षमा निर्वाचित भएका थिए ।

महर्जन २०७२ देखि २०७६ सम्म ललितपुर जिल्ला खेलकुद विकास समितिको अध्यक्ष समेत रहेका थिए । पद भार ग्रहण गर्दै कार्यवाहक अध्यक्ष महर्जनले बुद्धिचाल खेल विकास र विस्तारका लागि सबैलाई समेटेर अघि बढ्ने प्रतिबद्धता व्यक्त गरेको महासंघले जनाएको छ ।