गिनिज इन्टरनेसनल उमाविले प्रथम उपत्यकाव्यापी उमावि स्तरीय डण्डीबियो प्रतियोगिताको उपाधि बुधबार जितेको छ ।
उपत्यकाव्यापी उमाविस्तरीय डण्डीबियो विजेतालाई ट्रफी प्रदान गर्दै सदस्य–सचिव केशवकुमार विष्ट ।
त्रिपुरेश्वरस्थित राष्ट्रिय खेलकुद परिषद् (राखेप) को प्राङ्गणमा भएको फाइनलमा जिनिजले ग्लोरी इङलिस बोर्डिङ स्कुललाई ३०४–२३२ अंकले पराजित गर्यो । जितमा सजन यादवले सर्वाधिक १०६ अंक योगदान गरे । त्यस्तै देशान्त निरौलाले ६४, महेश टमाटाले ४९, सन्जिव दाहालले ४१ तथा विजय थापाले ४४ अंक जोडे ।
तेश्रो स्थानका लागि भएको खेलमा आइडियल उमाविले सन्जिवनी वैकल्पिक उमाविलाई २९०–१८० ले हरायो । आइडियलका अल्विस राना मगरले सर्वाधिक ८५ अंक बटुले ।
शीर्ष तीन स्थान हात पार्ने टिमले क्रमश: १० हजार, ७ हजार र ५ हजार नगद पुरस्कार प्राप्त गरे । विजेतालाई राष्ट्रिय खेलकुद परिषद् (राखेप) का सदस्य–सचिव केशवकुमार विष्ट र खेलकुद प्रतियोगिता तथा योजना विभागका प्रमुख प्रकाशचन्द्र घिमिरेले पुरस्कृत गरे ।
परम्परागत तथा मौलिकता बोकेका खेललाई संरक्षण र सम्वद्र्धन गर्ने उद्देश्यले राखेपद्वारा आयोजित दुईदिने प्रतियोगितामा उपत्यकाका ९ टिमले नकआउट आधारमा प्रतिस्पर्धा गरेको खेलकुद प्रतियोगिता तथा योजना विभागका प्रशासकीय अधिकृत मीनकुमार शर्माले जनाएका छन् ।
