काठमाडौं (हाम्रो खेलकुद)– एन्जल्स हार्ट कलेजले होङवाङ्जी ढोरपाटन महिला भलिबल डबल लिग च्याम्पियनसिपमा पहिलो जित निकालेको छ ।

तेस्रो दिन आइतबारको पाँचौं तथा अन्तिम खेलमा एन्जल्स हार्टके धादिङ स्पोर्टस क्लबलाई ३-० को सोझो सेटमा हराएको हो। आफ्नो तेस्रो खेलमा पहिलो जित निकाल्ने क्रममा एन्जल्स हार्ट २५-११,२५-२३, २५-१८ ले विजयी भएको छ ।

आज धादिङ र एन्जल्स हार्ट दुबै टोलीले दुई खेल खेलेका छन् । आइतबार अन्य खेलमा त्रिभुवन आर्मी क्लब, एपिएफ, चन्द्रागिरी नगरपालिका महिला भलिबल टिम र पहिलो खेलमा धादिङ विजयी भएका थिए।

विभागीय डर्बीमा आर्मीले नेपाल पुलिस क्लबलाई ३-१ ले हराउँदै तेस्रो खेलमा पहिलो जित हासिल गरेको थियो । प्रतिस्पर्धात्मक तेस्रो र चौथो सेटमा उच्च प्रर्दशनका साथ आर्मीले पुलिसलाई २५-१९,१२-२५,२५-२३,३०-२८ ले हराएको हो । आर्मीकी‌ आरती सुवेदीको प्रदर्शन प्रभावशाली रह्यो र उनै खेलको प्लेयर अफ दि म्याच बनिन् ।

अघिल्ला दुई खेलमा आर्मी न्यु डायमण्डसँग ३-२ र एपिएफसँग ३-१ ले पराजित भएको थियो। पुलिसले पहिलो खेलमा जावलाखेल भलिबल ट्रेनिङ क्लब र अर्कोमा एन्जल्स हार्ट कलेजलाई हराएको थियो।

सबै ३ खेल जित्नेमा एपिएफ र न्यु डायमण्ड मात्र छन्।
ढोरपाटन स्पोर्टस क्लबको आयोजनामा गोगंबु बसपार्क नजिक डिभी मार्केटसँगैको कोर्टमा जारी प्रतियोगितामा एपिएफले जावलाखेललाई ३-० ले हराएको थियो ।

एपिएफले २५-१, २५-३,२५-८ ले सहजै जितेको थियो। पहिलो सेटमा एपिएफले १७ अंक जोडेपछि जावलाखेलले पहिलो अंक बटुलेको थियो। त्यो पनि एपिएफको गल्तिमा जावलाखेले अंक जोडेको हो । जावलाखेलको त्यो तेस्रो हार हो ।

९ अंकसहित एपिएफ शीर्षस्थानमा छ। न्यु डायमण्न्डको  ८ अंक  छ । धादिङ स्पोर्टस क्लब , पुलिसको समान ६ , आर्मीको ४ र एन्जल्स हार्टको ३ अंक छ ।

त्यसअघि न्यु डायमण्डले एन्जल्स हार्ट कलेजलाई २५–१३,२५–८, २५–९ को सोझो सेटले हराएको थियो ।
न्यु डायमन्डले यसअघि पहिलो खेलमा आर्मी र अर्को खेलमा बागमती प्रदेशलाई हराएको थियो ।

आइतबारको पहिलो खेलमा धादिङले बागमतीलाई २५–८, २५–१३,२५–१२ ले हराएको थियो। बागमतीले लगातार तेस्रो खेल गुमाएको छ ।

ढोरपाटन स्पोर्टस क्लबले आयोजना गरेको लिगमा एपिएफ, बागमती, पुलिस , जावलाखेल, आर्मी , न्यु डायमण्ड , धादिङ र एन्जल्स हार्ट गरि ८ टोलीको सहभागिता रहेको छ ।

पहिलो चरणमा शीर्ष ६ स्थानमा रहने टोलीले दोस्रो लिगमा पुनः प्रतिस्पर्धा गर्ने ढोरपाटनले जनाएको छ । ढोरपाटनको १६ औं संस्करणको उत्कृष्ट खेलाडी र वर्षको उत्कृष्ट खेलाडीले एम्पियरको स्कुटर प्राप्त गर्नेछन् ।

प्रतियोगिताको विजेता टोलीले ५ लाख १ हजार, दोस्रो टोलीले २ लाख ५० हजार, तेस्रो टोलीले १ लाख २५ हजार, चौथो टोलीले ७५ हजार, पाँचौं टोलीले ५० हजार र छैटौं टोलीले २५ हजार रुपैयाँ प्राप्त गर्नेछ ।