बुटवल (हाम्रो खेलकुद)– बुटवलमा कर्णेल उजिरसिंह थापा स्मृति मेयर कप अन्तर्राष्ट्रिय बुद्धिचाल प्रतियोगिता हुने भएको छ । बुटवल उपमहानगरपालिका बुद्धिचाल संघले चैत २४ देखि २७ गतेसम्म बुद्धिचाल प्रतियोगिता गर्न लागेको आइतबार आयोजित पत्रकार सम्मेलन जानकारी दिइयो ।

४ दिनसम्म चल्ने प्रतियोगितामा सहभागि हुनको लागि नेपाल सहित भारत, वंगलादेश, श्रीलंका, अमेरिकाबाट समेत गरी अहिलेसम्म १ सय १७ जनाले नाम दर्ता गराईसकेको बताइएको छ । प्रतियोगितामा ४ सय जनासम्म सहभागी गराउन सकिने बुटवल उपमहानगरपालिका बुद्धिचाल संघका अध्यक्ष सुधिर पुनले बताए ।

प्रतियोगितामा सहभागी हुनका लागि रुपन्देही जिल्लाका खेलाडीलाई ३ हजार रुपैंया दर्ता शुल्क निर्धारण गरिएको बताइएको छ । त्यस्तै रुपन्देहीका विद्यार्थीलाई २ हजार रुपैंया, रुपन्देही बाहेककालाई ७ हजार रुपैंया र नेपाल बाहिरका खेलाडिलाई १० हजार रुपैंया दर्ता शुल्क निर्धारण गरिएको प्रतियोगिताका संयोजक माधवप्रसाद प्रधानले जानकारी दिए ।

प्रतियोगिता ७१ जनालाई नगद पुरस्कार प्रदान गरिने बताइएको छ । प्रतियोगिताको विजेताले २ लाख, दोस्रो खेलाडीले १ लाख १० हजार, तेस्रोले ६० हजार, चौथोले ४० हजार र पाँचौंले ३० हजार रुपैंया पाउनेछन् ।

त्यस्तै छैठौंदेखि दशौंस्थानमा आउनेले २० हजार, ११ औंंदेखि १५ औंसम्म आउनेलाई १५ हजार तथा १६ औं देखि २० औं स्थानसम्म आउनेलाई १३ हजार रुपैंया प्राप्त गर्ने प्रतियोगिताका प्रचारप्रसार संयोजक हरिष ढकालले जानकारी दिए । त्यस्तैगरी विधागत रुपमा २० वटा विधामा खेलाइने बताइएको छ । प्रतियोगितामा कुल कुल १० लाख १ हजार रुपैंया पुरस्कार रहेको बताइएको छ ।

प्रतियोगितामा झण्डै ४६ लाख रुपैंया लाग्ने अनुमान गरिएको छ । बुटवल उपमहानगरपालिकाले १५ लाख रुपैंयाले उपलब्ध गराउने १५ लाख रुपैयाँ खेलाडी दर्ताबाट संकलन हुने तथा बाँकी रकम प्रयोजक र सहयोग संकलन गरिने अध्यक्ष पुनले बताए ।

पत्रकार सम्मेलनमा बोल्दै बुटवल उपमहानगरपालिका खेलकुद विकास समितिका अध्यक्ष बोनिन पियाले बुटवललाई खेलकुदको हवको रुपमा विकास गर्न खेलकुदका क्षेत्रमा नगरपालिकाले उल्लेखनीय लगानी गरिरहेको बताए ।