अर्जुन कार्की, बागलुङ

त्रिभुवन आर्मी क्लबले चैत्राष्टमी मेलाको अवसरमा आयोजित कालिका कप भलिबल प्रतियोगिताको उपाधि जितेको छ । बागलुङ घुम्टे रेष्टुरेण्टलाई बिहीबार भएको फाइनलमा ३–० को सोझो सेटले पराजित गर्दै आर्मीले उपाधि जितेको हो ।

४ भारतीय खेलाडी सहित कोर्टमा उत्रेको घुम्टेका विरुद्धमा आर्मीका खेलाडीहरुले उत्कृष्ट प्रदर्शन गरेका थिए ।
आर्मीले खेल २५–१८,२५–१२,२५–२२ ले जितेको थियो । कस्तुरी युवा क्लब तेस्रो भएको छ । बिहिबार नै भएको खेलमा कस्तुरीले कालिका युवा क्लबलाई २५–२१, २५–२२, २५–१२ ले विजयी भएको थियो ।

आर्मीले ट्रफीसहित ३ लाख, घुम्टे रेष्टुरेण्टले १ लाख ५० हजार र कस्तुरीले १ लाख रुपैयाँ प्राप्त गरेको आयोजक कालिका भगवती गुठी व्यवस्थापन समितिका अध्यक्ष कुमार खड्काले बताए ।

यस्तै विधागत पुरस्कारमा पनि आर्मीका खेलाडीको वर्चस्व रह्यो । आर्मीका शरण सामरी क्षेत्री प्रतियोगिताको सर्वोत्कृष्ट खेलाडी घोषित भए ।

आर्मीका धनपति कुँवर उत्कृष्ट स्पाइकर, कप्तान हरि बहादुर अधिकारी उत्कृष्ट ब्लकर, सम्राट भण्डारी उत्कृष्ट सेटर र नरेन्द्र गिरी उत्कृष्ट चुनिए । बागलुङ घुम्टेका राजनेश सिंह उत्कृष्ट सर्भर र कस्तुरीका निरज थापा उत्कृष्ट डिफेन्डर घोषित भए ।