काठमाडौं (हाम्रो खेलकुद) – सुरुमा ८ खेलाडीले भाग लिने भनिएपनि उज्वेकिस्तानमा शनिबार सुरु हुने एएसबीसी यु २२ एसियाली बक्सिङ च्याम्पियनसिप ३ नेपाली खेलाडीले मात्र चुनौती पेश गर्ने भएका छन् ।

गत साता एसियाली बक्सिङ महासंघले च्याम्पियनसिपमा नेपालका ८ खेलाडीले भाग लिने भन्दै नाम सार्वजनिक गरेको थियो । तर नेपाल बक्सिङ महासंघका महासचिव मानबहादुर भण्डारीले पदक जित्ने सम्भावित खेलाडीलाई पठाएको बताए ।

८ मध्येबाट ३ उत्कृष्टलाई पठाएको उनको दाबी थियो । केहि साता अघि सम्पन्न गणेशमान स्मृति बक्सिङ प्रतियोगिता र यसै महिना सम्पन्न प्रथम अन्तर प्रदेश राष्ट्रिय खेलकुदको प्रदर्शनलाई पनि हेरिएको भण्डारीले बताए ।

अघिल्लो संस्करणमा ऐतिहासिक पदक विजेता सुष्मा तामाङ सहित रमिशा श्रेष्ठ र लालप्रसाद उप्रेतीले यसपटक चुनौती पेश गर्नेछन् । उज्वेकिस्तानको अस्ताना हुने च्याम्पियनसिपमा महिलाको ४८ केजीमा सुष्मा, ५० केजीमा रमिशा तथा पुरुषको ४८ केजीमा लालप्रसादले प्रतिस्पर्धा गर्नेछन् ।

थाइल्याण्डमा भएको अघिल्लो संस्करणमा सुष्माले रजत पदक जितेकी थिइन् । एसियाली स्तरमा नेपाली बक्सिङ खेलाडीले जितेको त्यो पहिलो पदक हो । टोलीको प्रशिक्षकमा सुजित पुन मगर छन् । च्याम्पियनसिपमा धनकुमार मैनालीले निर्णायकको भुमिका निभाउने छन् । ५ सदस्यीय नेपाली टोलीलाई राष्ट्रिय खेलकुद परिषदका सदस्य सचिव टंकलाल घिसिङले बुधबार विदाई गरे ।