काठमाडौं (हाम्रो खेलकुद)- एभरेष्ट महिला भलिबल लिग (इडब्लुभिएल) टोली ललितपुर क्विन्सले १३ औं दक्षिण एसियाली खेलकुद (साग) को दोहोरो स्वर्ण पदक विजेता आयशा शाक्यलाई गुडविल एम्बेसडर नियुक्त गरेको छ ।

ललितपुरकी आयशाले सागमा तेक्वान्दोकी सफल खेलाडी मध्ये एक हुन्। एसियाली खेलकुदमा कास्य पदक जितेकी आयशाले सागमा समग्रमा ३ स्वर्ण र २ रजत पदक जितेकी‌छिन्।

‘ललितपुर क्विन्स सँग आबद्ध हुन पाउँदा असाध्यै खुसी छु,’ आयशाले भनिन्, ‘ललितपुरमा जन्मेर हुर्किँदै गर्दा यस उपत्यकासँग मेरो गहिरो आत्मीयता छ र आज ललितपुर क्विन्ससँग जोडिनु मेरो लागि सौभाग्य र गौरवको क्षण हो ।’

भलिबल नेपालको राष्ट्रिय खेल हुनुका साथै लोकप्रिय खेलमा जोडिन पाउँदा उत्साहित रहेको जनाउँदै आयशाले भनिन्, ललितपुर क्विन्सलाई शुभकामना व्यक्त गर्दछु । उपाधि ललितपुरमा भित्रिनेछ भन्ने मलाई विश्वास छ।’

आयशालाई टोलीमा स्वागत गर्न पाउँदा खुसी लागेको ललितपुर क्विन्सले जनाएको छ। ‘आयशा खेलकुदमा आफ्नो क्यारियर बनाउने लक्ष्य लिएर अघि बढ्दै गरेका महिला लागि प्रेरणाको श्रोत हो । हामी विश्वस्त छौं कि उनको उपस्थितिले हाम्रा खेलाडीहरूलाई प्रेरित गर्नेछ र उहाँहरूको हौसला ठप उच्च हुनेछ, ‘ललितपुरले भनेको छ।

इन्फिनिटी ड्रिम्स प्रा लिले आयोजना गर्ने इडब्लुभिएलमा असोज १४ देखि असोज १९ गते हुनेछ। राष्ट्रिय भलिबल टोलीकी लिबेरो सलिना श्रेष्ठ कप्तान रहेको टोलीको प्रशिक्षकमा उत्सव खड्का छन् ।

ललितपुर क्विन्स टोली: सलिना श्रेष्ठ ‘ए’, पुनम चन्द ‘बि’, कामना विष्ट ‘बि’, साफिया पुन ‘बि’, निशा चौधरी ‘बि’, अनुषा चौधरी ‘सी’, नेहा चौधरी ‘सी’, भावना तामाङ ‘सी’।