काठमाडौं (हाम्रो खेलकुद)– काठमाडौं महानगरपालिकाले दोस्रो प्रयागराज सिंह सुवाल स्मृति अन्तर वडा फुटसल प्रतियोगितामा विजयी सुरुआत गरेको छ । लैनचौर फुटसल मैदानमा मंगलवार भएको उद्घाटन खेलमा काठमाडौं महानगरले आयोजक महानगरकै वडा नं २३ लाई टाइब्रेकरमा २–१ ले हरायो ।

काठमाडौँ महानगर र वडा नं २३ ले निर्धारित समयको खेलमा १–१ को बराबरीमा टुंगिएको थियो । अनुप प्रधानले काठमाडौँ महानगरका लागि पहिलो अग्रता दिलाएका थिए । वडा नं २३ का राजीव चित्रकारले बराबरी गोल गरे । त्यसपछि पेनाल्टी सुटआउटमा काठमाडौं महानगरले बाजी मारेको थियो । महानगरका अनुप प्लेयर अफ दि म्याच चुनिए ।

पहिलो दिन अन्य खेलमा वडा नं २ र वडा नं ६ ले पनि जित हासिल गरे । दोस्रो खेलमा वडा नं ९ ले वडा नं २७ लाई २–० ले पराजित गर्यो । विजयी टिमका लागि दुवै गोल मिङमा लामा तामाङले गरे । मिङमानै प्लेयर अफ दि म्याच चुनिए ।

तेस्रो खेलमा वडा नं ६ ले वडा नं ११ लाई ३–२ ले हरायो । वडा ६ का लागि विपल्व लामा, दिपेश श्रेष्ठ र केशव भण्डारीले गोल गरे । वडा नं ११ का जनक कोइारला र रितेश महतोले गोल गरे । सो खेलमा वडा ६ का केशवले प्लेयर अफ दि म्याच घोषित भए ।

यसअघि प्रतियोगिताको उद्घाटन काठमाडौँ महानगरपालिकाकी उपमेयर सुनिता डंगोलले गरिन् । काठमाडौँ महानगरपालिका केन्द्रसहित ३१ वडाको सहभागिता रहेको प्रतियोगितामा विजेता टोलीले २ लाख र दोस्रो टोलीले १ लाख रुपैयाँ प्राप्त गर्नेछ । विधागततर्फ उत्कृष्ट खेलाडी, सर्वाधिक गोलकर्ता र उत्कृष्ट गोलरक्षकलाई जनही १० हजार रुपैयाँले पुरस्कृत हुनेछन् ।