काठमाडौं (हाम्रो खेलकुद)- माल्दिभ्समा जारी १५औं वल्ड बडी बिल्डिङ एण्ड फिजिक्स स्पोर्ट्स च्याम्पियनसिपमा नेपालले आज ३ वटा रजत पदक जितेको छ।

नेपालको लागि शुक्रवार रुजेश शाही, रजनी श्रेष्ठ र प्रज्वलमान शाक्यले रजत पदक दिलाएका हुन् ।

रुजेशले ६० केजी तौल समूहमा रजत जिते । वल्ड च्याम्पियनसिपमा उनको त्यो तेस्रो पदक हो। उनले यसअघि सन् २०१५ मा रजत र २०१७ मा कास्य जितेका थिए। यो स्पर्धामा थाइल्याण्डका खेलाडीले स्वर्ण हात पारेको‌ बताइएको छ।

एसियन च्याम्पियनसिपमा ऐतिहासिक स्वर्ण विजेता रजनी श्रेष्ठले महिला ५५ केजी मुनिको तौल समुहमा रजत प्राप्त गरिन्। यो स्पर्धामा भियतनामकी खेलाडीले स्वर्ण जितिन्। रजनीले यसअघि ५६औं एसियन बडी बिल्डिङ च्याम्पियनसिपमा स्वर्ण जितेकी थिइन्। वल्ड च्याम्पियनसिपमा उनको यो पहिलो सहभागीता हो।

आजै नेपाललाई अर्को रजत प्रज्वलमानले दिलाए। उनले मास्टर तर्फ ४०-४९ वर्ष उमेर समुहमा रजत आफ्नो नाममा लेखाए। उनले ६५ केजीतर्फ भने उत्कृष्ट पाँचमा स्थान बनाएका थिए।

भोलि रुजेश र रजनीले मिक्स पियरमा तथा सनम मुलगुठीले स्विम सुट र मोडल फिजिक्समा दाबेदारी प्रस्तुत गर्नेछन्। जारी च्याम्पियनसिपमा ४१ राष्ट्रका ३ सय खेलाडीको सहभागिता रहेको जनाइएको छ।