काठमाडौं (हाम्रो खेलकुद) – तोरण विक्रम शाहीले सूर्य नेपाल सेन्ट्रल ओपनको तेस्रो दिन बुधवार १-अन्डर ७१ स्कोर गरे।

समग्रमा ५६ होलको समाप्तीमा ११-अन्डर २ सय ५ सहित एमेच्योरद्वय सदभाव आचार्य र राहुल विकेलाई ४ स्ट्रोकले पछि पारे। अन्तिम १८ होलको खेल बाकी छँदा ४ स्ट्रोकको अग्रतामा तोरणले उपाधि जित्ने संभावनालाई बलियो बनाएका छन्।

तेस्रो दिनको सुरूवात गर्दा तोरणसँग ३ स्ट्रोकको अग्रता थियो भने सुरूवात पनि उत्कृष्ट गरे। उनले ६ होल सकिंदा चार बर्डी प्रहार गरिसकेको थिए। पहिलो, दोस्रो, पाँचौं र छैटौं होलमा एक-एक सट बचाउँदै सोचे जस्तै सुरूवात गरे।

नवौं होलमा भने दिनको पहिलो बोगी खेपे। फ्रन्ट नाइन ३-अन्डर ३३ मा पुरा गरे। नवौं होलको बोगीपछि उनले लय गुमाए। १२औं होलमा एक सट खेर फाले।

तीन-पारको १३औं होलमा बर्डी प्रहार गरे पनि १५औं र १६औं होलमा एक-एक सट खेर फाले। जसले गर्दा ब्याक नाइन २-ओभर ३८ मा सकाउन बाध्य भए।

पहिलो र दोस्रो दिन समान ५-अन्डर खेलेका तोरणको यो तुलनात्मक रूपमा कमजोर प्रदर्शन हो। तर उनले अग्रता भने ४ स्ट्रोकमा पुर्याए।

एमेच्योरद्वय सदभाव आचार्य र राहुल विके समग्रमा ७-अन्डर २ सय ९ को स्कोरमा संयुक्तरुपमा दोस्रो स्थानमा रहे। गोकर्ण गल्फ क्लबमा आज एमेच्योर तथा डिफेन्डिङ च्याम्पियन सदभाव आचार्यले दिनको उत्कृष्ट स्कोरकार्ड निकाल्दै उनी पाँच स्थान माथी उक्लिए।

पहिलो, तेस्रो र सातौं होलमा एक-एक सट बचाउँदा फ्रन्ट नाइनमा ३-अन्डर ३३ को नतिजा निकाले।यसपछि ११औं देखि १४औं होल‌मा लगातार चार बर्डी प्रहार गर्न सफल रहे। १५औं होलको बोगीले ब्याक नाइन ३-अन्डर ३३ मा पुरा गरे।

राहुलले २-अन्डर ७० को स्कोर दर्ज गर्दै उनी दुई स्थान माथी उक्लिए। उनले सातौं र नवौं होलमा बर्डी प्रहार गर्दै फ्रन्ट नाइन बोगी रहित खेले। यसपछि ११औं होलको बोगी विरूद्ध १५औं होलको बर्डीले ब्याक नाइन इभन-पार ३६ मा सकाए।

धरानका प्रो निरज तामाङले १-अन्डर ७१ को स्कोर जोडे। समग्रमा ४-अन्डर २१२ सहित चौथो स्थानमा उक्लिए। दाबेदार नेपाल नम्बर एक भुवन नगरकोटीले ५-ओभर ७७ को खराब प्रदर्शन गरे। यो प्रदर्शनमा उनी समग्रमा १-अन्डर २१५ सहित पाँचौ स्थानमा तल झरे।

जयराम श्रेष्ठले आज १-अन्डर ७१ को स्कोरमा, समग्रमा इभन-पार २१६ को नतिजा निकाल्दै छैटौं स्थानमा छन। समग्रमा २-ओभर २१८ सहित रवि खड्का, कृष्णमान राजबाहक, राजेन्द्र थापा मगर र सुनिल केसीले संयुक्तरुपमा सातौं स्थान बाँडे।

रवि र कृष्णमानले समान १-अन्डर ७१ मा तेस्रो दिनको खेल सकाए। राजेन्द्रले २-ओभर ७४ खेले। फाइनल ग्रुपमा खेलेका सुनिलले बिर्सनलायक ९-ओभर ८१ को स्कोर निकाले। यो स्कोरमा उनी पाँच पटकको स्थान तल झरे।

४ दिन सम्म चल्ने प्रतियोगिताको कुल ८ लाख ८२ हजार रुपैयाँ पुरस्कार रहेको छ। विजेताले १ लाख ५० हजार दोस्रोले १ लाख र तेस्रो खेलाडीले ७५ हजार रुपैयाँ प्राप्त गर्नेछन् ।