काठमाडौं (हाम्रो खेलकुद)- साविक विजेता निरज तामाङले ४-अन्डर ६४ को उत्कृष्ट स्कोर निकाल्दै सूर्य नेपाल काठमाडौं ओपनको तेस्रो दिन बिहीवार शीर्षस्थानमा उक्लिएका छन्।

निरजले समग्रमा १०-अन्डर १९४ सहित एमेच्योर सदभाव आचार्यलाई एक स्ट्रोकले पछि पारेका छन।‌ अन्तिम १८ होलको खेल बाँकी छँदा प्रो निरज र एमेच्योर सदभावबीच कडा प्रतिस्पर्धा हुने संभावना रहेको छ।‌

रोयल नेपाल गल्फ कोर्समा निरजले सुरुवात सानदार गरे। दोस्रो, चौथो, छैटौं र सातौं होलमा एक-एक सट बचाए। नवौं होलको बोगीले फ्रन्ट नाइन ३-अन्डर ३१ खेले।

ब्याक नाइनमा पनि १०औं र ११औं होलमा बर्डी प्रहार गरे। तर १२औं‌ होलमा बोगी खेल्दै ब्याक नाइनमा १-अन्डर ३३ को स्कोर निकाले।

तेस्रो दिन सदभावले ४-अन्डर ६४ स्कोर गर्दा ५४ होलको समाप्तीमा ९-अन्डर १९५ सहित दोस्रो स्थानमा उक्लिए। सदभावले बोगी रहित स्कोर कार्ड तयार पारे। यो क्रममा कुल चार बर्डी प्रहार गरे।

फ्रन्ट नाइन १-अन्डर ३३ र ब्याक नाइन ३-अन्डर ३१ मा सकाए। उनले चौथो, दशौं, तेर्हौ र सत्रौं होलमा बर्डीको सफलता प्राप्त गरे।

दोस्रो दिनका लिडर विष्णु प्रसाद शर्माले १-ओभर ६९ को खराब प्रदर्शन गरे। समग्रमा ६-अन्डर १९८ को स्कोरमा तेस्रो स्थानमा तल झर्न बाध्य भए।

विष्णुले फ्रन्ट नाइन १-अन्डर ३३ मा पुरा गरे। उनले पहिलो, तेस्रो र नवौं होलमा बर्डी प्रहार गरे। पाँचौं र आठौं होलमा बोगी खेपे।

तर ब्याक नाइनमा उनले लय गुमाए। १०औं होलमा बर्डी प्रहार गरे। यसपछि १५औं, १६औं र १७औं होलमा एक-एक सट खेर फले। ब्याक नाइनमा २-ओभर ३६ को स्कोर दर्ज गरे। उनले पहिलो र दोश्रो दिन अन्डर पारमा खेल सकाएका थिए।

समग्रमा ५-अन्डर १९९ सहित दिनेश प्रजापति चौथो स्थानमा यथावत रहे। उनले आज १-अन्डर ६७ को स्कोर निकाले। एमेच्योर गल्फर राहुल विके समग्रमा २-अन्डर २०२ सहित पाँचौं स्थानमा छन्। उनले पनि आज १-अन्डर ६७ मा खेल सकाए।

कुल ७ लाख ३५ हजार रुपैयाँ पुरस्कार लागि खेलाडीहरुले प्रतिस्पर्धा गरिरहेका छन। विजेताले उपाधिसँगै १ लाख ५० हजार , दोस्रोले ८५ हजार र तेस्रोलर ६८ हजार रुपैयाँ प्राप्त पार्नेछन्।
साथै कट बनाउने २१ प्रो गल्फरले पनि नगद पुरस्कार प्राप्त गर्नेछन्।

प्रोफेसनल गल्फर एसोसिएसन (पिजिए) को आयोजना‌ र सूर्य नेपालको प्रायोजनमा जारी प्रतियोगिताको अन्तिम शुक्रवार १८ होलको खेल हुनेछ।