सुमन अधिकारी, बुटवल

बुटवलमा जारी मदन भण्डारी गोल्डकप इन्डो–नेपाल रनिङ शिल्ड पुरुष भलिबल च्याम्पियनसिप–२०८१ अन्तरगत बुधवार तय गरिएका ३ खेल मध्ये २ खेल मात्र सम्भव भएको छ।

चिसो र हुस्सुसंगै शीत परेपछि मैदान गिलो भएका कारण एपिएफ र गल्कोट भलिबल क्लबबिचको खेल स्थगित गर्नु परेको आयोजकले जनाएका छन् ।

एपिएफ र गल्कोटबिच चौथो सेट खेल्ने क्रममा मौसममा परिर्वतन हुनुकासाथै कोर्टमा शीत पर्न थालेपछि एपिएफका खेलाडीले खेल्न नसकिने भनि रेफ्रिलाई भनेका थिए ।

त्यस अवस्थामा एपिएफ ९–६ अंकले अगाडि थियो । केहि समय रोकिएर खेल्ने प्रयास गर्दा खेलाडी चिप्लन थालेपछि टाइम आउट लिएर खेल रोक्न भनिएको थियो ।

खेल रोकिदा एपिएफले १ र गल्कोटले २ सेट जितका थिए । गल्कोटले ५ विदेशी इरानी खेलाडी मैदानमा उतारेको थियो । यसैबिच आयोजकले पूर्व खेलहरु नियमित तालिका अनुसार हुने र रोकिएको खेल प्राविधिक टिम बसेर दिन तय गर्ने जनाएको छ ।

त्यसअघि बिहीवारको दोस्रो खेलमा मणिमुकुन्द भलिबल क्लबले रुकुम पश्चिम भलिबल प्रशिक्षण केन्द्रलाई ३-० को सोझो सेटमा हरायो ।विजयी भयो । मणिमुकुन्दल २५-२१, २५-१५ र २५-२२ ले विजयी भयो ।

प्रतियोगिताको दोस्रो दिनको पहिलो खेलमा त्रिभुवन आर्मीले गुजरात प्रदेश भलिबल एसोसियसलाई ३-१ को सेटमा पराजित गरेको थियो। आर्मीले खेलको पहिलो सेट १५-२५ ले गुमाएको थियो।

त्यसपछि दोस्रो सेट २९-२७ ले जित्दै आर्मी खेल फर्कियो । तेस्रो र चौथो सेट २५-२१ र २५-२२ ले जित्दै आर्मी निकाल्यो ।

शुक्रवारको पहिलो खेल मदन भण्डारी स्पोटर्स एकेडेमी र रुकुक पश्चिम तथा दोस्रो खेल गुजरात र एपिएफबिच हुनेछ ।

पुस २४ गतेसम्म सञ्चालन हुने प्रतियोगितामा नेपाल र भारतका ८ टोलीको सहभागिता छ । समुह ‘ए’मा नेपाल पुलिस क्लब, मणिमुकुन्द , रुकुम पश्चिम र मदन भण्डारी एकेडेमी छन् । समुह ‘बी’मा एपिएफ, आर्मी, गल्कोट छन् ।

प्रतियोगिताको विजेताले ७ लाख ५० हजार, दोस्रो टोलीले ३ लाख ५० हजार, तेस्रोले१ लाख ७५ हजार र चौथो टोलीले १लाख रुपैयाँ पाउनेछ।