काठमाडौं (हाम्रो खेलकुद )- नेपाल डोरीतान संघको आयोजनामा यसै साता तेस्रो राष्ट्रिय डोरीतान ( टग अफ वार) हुने भएको छ ।

भक्तपुरको सानोथिमी स्थित एसओएस हर्मन माइनर स्कुलमा फागुन १६ र १७ गते हुने प्रतियोगितामा पुरुषतर्फ ७ प्रदेश र तीन विभागीय (सेना, प्रहरी र सशस्त्र) सहित १० टोली तथा महिलातर्फ ५ प्रदेश र ३ विभागीय गरी ८ टोलीले सहभागिता रहने सोमवार आयोजित पत्रकार सम्मेलनमा संघका अध्यक्ष भवानी प्रसाद पौडेलले जानकारी दिए।

महिलामा सुदूरपश्चिम र कर्णाली प्रदेशको सहभागिता रहने छैन। प्रतियोगितामा कुल १८ टिमका १ सय ६२ खेलाडीले भाग लिनेछन्। पुरुष तर्फ ६४० केजी तथा महिला तर्फ ५८० केजी तौल समूहमा प्रतिस्पर्धा हुनेछ।

प्रतियोगिताको पुरुषतर्फको विजेता टोलीले १ लाख र दोस्रो टोलीले ५० हजार रुपैयाँ पुरस्कार प्राप्त गर्नेछ । महिला तर्फको विजेताले ६० हजार तथा दोस्रो टोलीले ४० हजार रुपैंया प्राप्त गर्नेछ।

नेपालको पुरानो मौलिक खेल भएर पनि लामो समयसम्म ओझेलमा परेको खेलको राष्ट्रिय प्रतियोगिताको आयोजनाले डोरीतान खेलको प्रवर्द्धनमा टेवा पुग्ने अध्यक्ष पौडेलले विश्वास व्यक्त गरे।

प्रतियोगिताको कुल बजेट ३१ लाख रुपैयाँ रहेको त्यसमा राष्ट्रिय खेलकुद परिषद र संघका पदाधिकारी तथा विभिन्न सहयोगीको आर्थिक सहयोग रहने बताइएको छ।